20 Gusht, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditëve të shkuara dhe domethënien e tyre për ne! Artikulli është përmbledhje javore me lajme që kryesuan javë  dhe bëhen një me ty kur ndajmë lajmet e njëjta në Kosovën tonë. Paper ndanë me ty!

Lexoje këtë për veten: Gjithçka që humbë krijon hapësirë për diçka që ke nevojë!

Humbja shpesh është një pastrim i padukshëm, një dorë e butë që largon atë që nuk i shërben më shpirtit, duke lënë vend për dhurata që ndoshta nuk do të vinin kurrë pa boshllëkun që krijohet.

****

Mes deklaratve se presidenti Trump u dha fund gjashtë luftërave në botë përfshirë edhe Kosovën me Serbinë dhe në bazë të kësaj kauze Shtëpia e Bardhë e ka shpallur këtë muaj “presidentin Trump, president të paqes”, teksa ka harruar zemërimin në të gjithë botën  për urinë në Gaza dhe mbështetjen e presidentit për kryeministrin izraelit, Benjamin Netanyahun, gjë e cila mund t’ia venitë shpresat e tij për çmim Nobel, kështu paska thanë edhe CNN në analizën e tyre për takimet e fundit Trump-Putin dhe Trump-Zelensky.

Tek kojshitë tanë serb, skena politike pas zhvillimeve të fundit ka ndryshuar. Kjo pasi protestat atje nuk udhëhiqen nga partitë opozitare, por nga studentët dhe lëvizjet qytetare, me agjendë të re për liri, drejtësi dhe përgjegjësi, e cila do ta bëjë opozitën tradicionale ose të përshtatet, ose të zhduket nga skena.

Pra me pak fjalë bota është një katrahurë në të cilën ose mësohesh të jetosh ashtu siç është ose ngritesh në këmbë dhe revoltohesh për gjithçka që nuk të pëlqen.

***

Sot ka qenë dita e vazhdimit të konstituimit të Kuvendit, e nisur në prill.

Albulena Haxhiu dështoi për t’u bërë kryeparlamentare edhe në tentimin e parë pas publikimit të Aktgjykimit të Gjykatës Kushtetuese për seancën konstituive, ku pas saj Lëvizja Vetëvendosje e ka propozuar emrin e Donika Gërvallës për kryeparlamentare, e cila nuk mori votat e mjaftueshme.

Ajo mori 57 vota për, 56 kundër, tri abstenime.
Seanca e radhës do të mbahet më 22 gusht në orën 10.

A e kanë propozu LVV-ja me idenë që e kanë ditur se edhe Gërvalla nuk votohet? Nuk e dimë, por të paktën ndërroi emri, i cili mori më së shumti “jo” në historinë e konstituimit të Kuvendit të Kosovës.

***
A do të mbetet projekti 18-milionësh i sheshit “Xhorxh Bush” i bllokuar përfundimisht, apo Komuna e Prishtinës do të gjejë rrugë ligjore për ta vazhduar?

Gjykata Themelore e Prishtinës ka refuzuar kërkesën e Komunës për të shtyrë ekzekutimin e vendimit të Inspektoratit të Trashëgimisë Kulturore, duke lënë në fuqi ndalimin e punimeve në sheshin “Xhorxh Bush”. Projekti 18-milionësh, i nisur në mars, pa leje nga institucionet e trashëgimisë mbetet i bllokuar, ndërsa përplasjet politike mes kryetarit Përparim Rama dhe ministrit të Kulturës, Hajrulla Çeku, vijojnë.

***

Kur njeriu nxiton pa u ndalur në jetën e përditshme, Zoti gjen mënyrën për t’ia ulur ritmin. Të ndalon dhe të mëson të fillosh sërish nga e para, jo për të të dënuar, por për të udhëhequr drejt një rruge më të qëndrueshme dhe më të mençur. Çdo nisje e re bëhet një mundësi për të ndërtuar më fort, për të kuptuar më thellë dhe për të jetuar me më shumë kujdes e mirënjohje.