Çka ndodhi dje në Kosovë?
Mbrëmë pas orës 21:00, sipas të dhënave të fundit nga Komisioni Qendror i Zgjedhjeve (KQZ), me mbi 99% të votave të numëruara, rezultatet janë si më poshtë:
Lëvizja Vetëvendosje (LVV): 40.83% – 47 deputetë
Partia Demokratike e Kosovës (PDK): 22.15% – 25 deputetë
Lidhja Demokratike e Kosovës (LDK): 17.59% – 20 deputetë
Aleanca për Ardhmërinë e Kosovës (AAK): 7.47% – 8 deputetë
LVV ka dalë e para në 21 komuna të vendit.
Numri i mandateve për Lëvizjen Vetëvendosje, nëse merr 60% të votave nga diaspora, arrin në 49 deputetë.
Nëse siguron mbi 75% të votave nga jashtë, merr mbi 51 deputetë.
Nëse merr më pak se 50% të votave, numri i deputetëve bie në 46.
Përndryshe, votat e partive që nuk e kalojnë pragun as nuk shpërndahen, as nuk i shtohen ndonjë partie tjetër.
Këtë e ka bërë të ditur DnV në raportin e saj për zgjedhjet.
Pas shpalljes së rezultateve preliminare, PDK dhe AAK kanë refuzuar mundësinë e formimit të një koalicioni me LVV-në. LDK ende nuk ka marrë një qëndrim përfundimtar lidhur me këtë çështje. Kjo situatë ka ngritur pikëpyetje mbi stabilitetin politik dhe mundësinë e pasigurisë paszgjedhore në vend.
***
Misioni i Këshillit të Evropës (KiE) ka vlerësuar se zgjedhjet në Kosovë u zhvilluan në mënyrë paqësore. Megjithatë, ata kanë theksuar se përfaqësimi i grave në procesin zgjedhor mbetet i ulët dhe kërkon përmirësim.
***
Presidentja e Kosovës, Vjosa Osmani, mori pjesë në Samitin për Inteligjencën Artificiale, duke përfaqësuar vendin në këtë ngjarje ndërkombëtare.
***
Cacttus, kompania që zhvilloi aplikacionin e KQZ-së, tregoi arsyet pse pati komplikime. Sipas tyre, vëllimi i madh i qarkullimit dhe trafikut në webfaqe ishte shkaku kryesor i ngarkesës.
***
Tillti është një radio stacion, por është edhe një kafene ku shpesh, në hapësirën e mini-galerisë së artit, organizohen ekspozita. Këto ditë mund të vizitoni ekspozitën e Driton Selmanit, artistit të njohur kosovar.
Sipas udhërrëfyesit narrativ:
“Kjo ekspozitë zbulon një koncept pune që rimagjinon ndërveprimin midis zërit, identitetit dhe rezistencës. Në thelb të ekspozitës ndodhet bashkëpunimi i Selmanit me një rrobaqepës, ku qëndisja bëhet një metodë e rrëfimit të historive—fijet e qëndisura me precizitet lidhen mes vete, duke shkrirë histori, trupa dhe ide.”
Ekspozita duket fantastike, mos e humbisni!
***
Ndonjëherë, distancimi nga një problem ose shmangia e përkohshme e një situate të ndërlikuar lejon që gjërat të qetësohen, emocionet të stabilizohen dhe perspektiva të bëhet më e qartë. Kjo mund të ndihmojë në shmangien e vendimeve të nxituara dhe në gjetjen e një zgjidhjeje më të përshtatshme në momentin e duhur. Në fund të fundit, jo çdo sfidë kërkon një përballje të menjëhershme; ndonjëherë koha vetë është faktori kyç që sjell një zgjidhje më të mirë.
