31 Mars, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditës së djeshme dhe domethënien e tyre për ne! Artikujt janë ditorë dhe bëhen një me ty kur ndajmë përditshmërinë e njëjtë në Kosovën tonë. Paper ndanë me ty!

A nuk është dashuri? Si filxhani që mban çajin! Si karrigia qëndron e fortë dhe katërkëndëshe! Si dyshemeja pret fundin e këpucëve ose majat e gishtave. Si njeriu sakrifikon për dashurinë që ndjen ndaj Zotit, e tregon atë me respekt ndaj ushqimit dhe lutjeve.

Urime festa, lexues! Paqja qoftë mbi ty dhe mbi më të dashurit e tu!

Mes urimeve për unitet, solidaritet dhe paqe, s’ka si të mos mungojnë ngjarjet e përditshme që e mundësojnë zhvillimin.

Meqenëse sot është e hënë, ta shohim çka ndodhi në Kosovën e dashur këto ditët e fundit.

Nga shifrat pas certifikimit, është e qartë se VV-ja nuk mund të qeverisë e vetme, as me mbështetjen e pakicave, pasi nuk i dalin numrat. Kjo e çon partinë në dy mundësi: ose të sigurojë deputetë nga parti të tjera për një shumicë të brishtë, ose të hyjë në bisedime serioze me opozitën për një zgjidhje. Ose, thjesht, të pranojë të kalojë në opozitë.

A do t’i japë Nisma tri vota, apo ndonjë parti tjetër? Ende mbetet e paqartë!

Të gjitha këto skenarë duhet të shqyrtohen duke pasur në fokus interesin e qytetarëve të Kosovës. A na konvenon një situatë paqartësie, ku as nuk e dimë nëse kemi një qeveri në detyrë, pasi ata që janë në detyrë pritet të japin dorëheqje për të marrë postin e deputetit?

Në çdo rast, besohet se deri nga mesi i prillit Kuvendi do të konstituohet. Sa i përket qeverisë, nëse arrihet një marrëveshje – çfarëdo qoftë ajo – mund të formohet deri në mes ose fund të muajit. Në të kundërtën, vendi mund të shkojë sërish në zgjedhje, krejt kot.

***

Rreth dy muaj pas premierës, filmi Krejt e thirrin Rexhën, me regji dhe skenar të Ibër Dearit, përveç rrugëtimit ndërkombëtar, ka nisur të vlerësohet edhe me çmime. Në Festivalin Ndërkombëtar të Filmit dhe Televizionit Bif&st në Bari të Italisë, është shpërblyer me çmimin për Filmin më të Mirë në kategorinë ku garonte. Në kategorinë Meridiana, është vlerësuar rrëfimi i kësaj komedie emocionuese, që trajton qëndrueshmërinë e një komuniteti në kohëra moderne.

Me çmimin që mban emrin Franco Cassano, i emërtuar sipas sociologut të shquar italian, është vlerësuar cilësia e filmit të regjisorit shqiptar nga Maqedonia e Veriut në edicionin e 16-të të festivalit, të mbajtur nga 22 deri më 29 mars 2025.

***

Amir Rrahmani ka qenë titullar dhe ka luajtur tërë ndeshjen në fitoren 2:1 që Napoli e ka shënuar të dielën ndaj Milanit në ndeshjen e xhiros së 30-të të elitës së futbollit italian.

***

Le të shpresojmë që ditët në vijim të sjellin më shumë qartësi, më shumë unitet dhe më shumë arsye për t’u gëzuar. Pavarësisht sfidave, përpara kemi mundësi të reja dhe histori të bukura për t’u treguar. Gëzuar festën edhe një herë, dhe paqja qoftë gjithmonë me ne!