3 Prill, 2025

Shkruan: Erletë Rrustemi

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditës së djeshme dhe domethënien e tyre për ne! Artikujt janë ditorë dhe bëhen një me ty kur ndajmë përditshmërinë e njëjtë në Kosovën tonë. Paper ndanë me ty!

Nostalgjia është e çuditshme – nuk ka rëndësi nëse kujton diçka të mirë apo të keqe, ajo gjithmonë të lë me një boshllëk të vogël brenda vetes. Është një ndjenjë që të kthen pas në kohë, në momente që ndoshta dikur i ke marrë si të mirëqena, në kujtime që tashmë duken si ëndrra të largëta. Ajo të bën të ndiesh një ngrohtësi të ëmbël, por njëkohësisht edhe një dhimbje të butë, sepse realiteti i sotëm nuk mund të rikrijojë plotësisht atë që ke përjetuar dikur.

Çka ndodhi dje në Kosovë?

Në një prej ngjarjeve më tronditëse dje ishte vrasja e një polici në Kaçanik para hyrjes së ndërtesës ku jetonte. Tronditëse ishin edhe rrethanat e vrasjes edhe rrjedha e ngjarjes edhe pasi kaluan 24 orë nga vrasja e tij.

Pse nuk kemi nga policia një përshkrim fizik të të dyshuarve në lidhje me ngjarjen? Pse nuk ka një linjë të destinuar për ndarjen e informacioneve?

Cilatdo qofshin motivet po besoj që më e rëndësishme është gjetja e autorëve dhe dënimi i tyre meritor.

Mos të harrojmë që për 10 ditë në një vend të vogël si Kosova janë kryer pesë vrasje.

***

KEDS-i ka propozuar rritjen e çmimit të rrymës për 15 %. Qeveria po e përkrah këtë rritje. Është paralajmëruar protestë për të shtunën në ora 15:00. Dje (të mërkurën) disa aktivistë të nismës “Asnjë cent më shumë” ja zunë derën Zyrës së Rregullatorit të Energjisë, e cila e ka në komptencë ta miratoj vendimin për 15% më shtrenjtë. Policia menjëherë u vu në aksion dhe prangosi 12 protestues.

Të njëjtit kanë paralajmëruar për protestë dhe bllokadë edhe për sot.

Aktivisti Durim Jashari përmes një statusi në rrjetin social “Facebook”, ka thënë se policia edhe i ka rrahur brutalisht protestuesit.

“Policia që për minister ka Xhelal Sveçlen, ka ushtru dhunë të shfrenume ndaj aktivistëve protestues, te zyret e ZRrE-së. Policë civil dhe me uniforma, por pa numra identifikimi, me shkelma e grushta kane rrahur aktivistet që veç me trupat e tyne u kishin nxanë derën interesave të KEDS-it, në uniformë të ZRrE-së”, – është shprehur ai.

***

Jo bash dje, një ditë më parë (të martën), presidentja e vendit, Vjosa Osmani e vendosi datën për seancën konstituive të kuvendit për më 15 prill.

Menjëherë pas kësaj, kryeministri Albin Kurti, të mërkurën (dje) ka nisur takimet për qeverinë e re. Përveç me kryetaren e Partisë së Re Demokratike, Emilija Rexhepi, e kryetarin e Partisë për Liri, Drejtësi dhe Mbijetesë, Nenad Rashiq, ai takoi më vonë edhe kryetarin e partisë Iniciativa e Re Demokratike, Elbert Krasniqi.

Sa i përket anës tjetër, PDK-ja dhe LDK-ja, vazhdojnë me pohimet se nuk do të preferonin një bashkëpunim me LVV-në por s’është as që e potencojnë si të preferueshëm një bashkëpunim me vetë njëra-tjetrën, kurse AAK, beson në krjimin e një qeverie të opozitës.

Ec e bjeri në fije… kurgjo në fund nuk është shokuese çkado që vjen.

***

Prishtina Jazz Catz e mirëpriti Rona Nishliun si mysafire speciale për hapjen e mbrëmjes së 12-të të këtij jazz projekti. Ky jam-session promovonte artistët vendorë dhe ndërkombëtarë duke i dhënë mundësinë të luanin materiale origjinale, ndërsa një aspekt shumë i rëndësishëm i këtij eventi gjithmonë kishte qenë edhe zbulimi i talenteve të rinj muzikorë në jazz. Ngjarja u zhvillua më 1 prill, prej orës 20:00 e tutje, në qendrën kulturore Defy Them. Rona Nishliu është edhe organizatore e Festivalit të Jazz-it në Mitrovicë.

***

Nuk mund të jetë rastësi që njeriu për njeriun të jenë kaq të përsosur për të mbajtur njëri-tjetrin. Duart tona ndërlidhen, përqafimet përshtaten dhe çdo moment duket sikur ka qenë gjithmonë i destinuar. Ne kemi lindur për të dashur.