Ndodh vetëm një konferencë që tregon gjithçka për një vend, për Kosovën.
Të gjithë e kanë pritur konferencën e presidentes Osmani deri nga kthimi i saj nga Washingtoni, ku në një ligjeratë pati konfirmuar deklaratat e presidentit amerikan, Donald Trump, i cili pati thënë se në dy raste ka ndikuar në ndaljen e luftës mes Kosovës dhe Serbisë, e Osmani deklaroi se ky parandalim nga Trump, nuk ka të bëj me ndonjë rast të 2020-ës apo 2023-ës, por diçka më e vonshme si para disa javësh.
Richard Grenell, i dërguari për misione të posaçme, i pati quajtur deklaratat e Osmanit si manipuluese. S’është që doli edhe shumë ndryshe!
Dje Osmani as nuk ndajti hollësira e as nuk tregoi saktë çka ka deshtë me thanë.
“Kështu që, specifikat e informatave që ne i kemi marrë në maj ju siguroj që ne i marrim vazhdimisht, ato të fundit të majit kanë qenë ato të cilat unë j kam referuar sa kam qenë në SHBA, sepse kanë qenë më specifike. Kanë qenë lëvizje më specifike, të cilat u kanë përngjarë lëvizjeve që ne i kemi parë më 2023, pak a shumë dy muaj para (nga sulmi në Banjskë), lëvizje të ngjashme kanë qenë, mirëpo nuk është që kanë arritur të bëjnë ndonjë gjë, sepse institucionet tona e kanë kryer detyrën e tyre me vigjilencë”, ka deklaruar ajo.
Çka ndodhi, pse ke nevoja me marrë “bajraktarin” me një deklaratë të tillë, e pastaj me dhanë një shpjegim-pa shpjegim?!
***
Nejse mes tjerash e gjeti hapësirën edhe me u spjegu për ngërçin politik që është duke ndodhur në Kuvend.
Presidentja Vjosa Osmani ka thënë se nëse edhe këtë fundjavë nuk ka zgjidhje për bllokadën e krijuar në procesin e konstituimit të Kuvendit, në fillim të javës që vjen do t’i drejtohet Gjykatës Kushtetuese.
Pytjet që i qiti në diskutim ishin…
Çfarë ndodh me institucionet nëse nuk konstituohen deri më 26 korrik? A nënkupton kjo se çdo Kuvend i konstituuar pas 26 korrikut është antikushtetues? A nënkupton se çdo akt që mund ta miratojë Kuvendi është shkelje e Kushtetutës?
A mos synimi është krijimi i një kuvendi antikushtetues që me pasë mundësinë e shpërbërjes pastaj?
***
Korporata Energjetike e Kosovës i ka hapur aplikimet për tenderin mbi 137 milionësh për rehabilitimin dhe modernizimin e njësisë A3 të termocentralit “Kosova A”.
Për këtë tender janë paraqitur pesë oferta, të cilat do të trajtohen gjatë fazave të ardhshme. Ministrja në detyrë e Ekonomisë, Artane Rizvanolli dhe drejtues të ndërmarrjes e kanë theksuar rëndësinë për investimet në këtë njësi, e cila është në operim për më shumë se 50 vjet.
Njësia A3 është në operim për më shumë se 50 vjet. Në dosjen e tenderit të KEK-ut njoftohet se autoriteti kontraktues nuk ka kryer studim fizibiliteti dhe në pamundësi të specifikimeve teknike të detajuara për këtë aktivitet, e përdor procedurën konkurruese me negociata.
***
Nga 14 deri më 20 korrik 2025, qyteti i Pejës është shndërruar prap në një laborator të animacionit, artit, muzikës dhe aktivizmit me edicionin e radhës të Anibar International Animation Festival. Por këtë vit, gjithçka osht pak ma ndryshe, ma e komplikume, ma e çuditshme, ma e vërtetë, për shkak temës apo pyetjes që ANIBAR po e shtron. Tema e vitit 2025, e thjeshtë dhe tronditëse: “WTF?!”: një thirrje që është njëkohësisht pyetje dhe protestë, një piskamë ndaj pasigurisë globale dhe emocioneve personale që po reflektojnë kohën tonë. Nëse ndihesh i/e hutum, i/e lodhur, i/e zemëruar, i/e untë për kuptim: Anibar të pret, qashtu çysh je. WTF. Programi osht shumë i pasun që ju ndihmon me reflektu, kontemplu me filma dhe punëtori, ama edhe mu zbavit dhe tranu me Anibar afterparties me super muzikë.
***
Ndoshta nuk kemi gjithmonë përgjigje të qarta. Por kur politika ngatërrohet, institucionet ngecin dhe energjia harxhohet pa plan, mbetet arti ai që nuk premton shumë, por tregon gjithçka. Dhe ndoshta pikërisht aty, mes konfuzionit, lind nevoja për pyetjen më të ndershme të kohës sonë: WTF?
