27 Korrik, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditëve të shkuara dhe domethënien e tyre për ne! Artikulli është përmbledhje javore me lajme që kryesuan javë  dhe bëhen një me ty kur ndajmë lajmet e njëjta në Kosovën tonë. Paper ndanë me ty!

Nganjëherë, edhe kur e di që nuk je në vendin e duhur, që koha nuk është e favorshme dhe që rezultati është i parashikueshëm, sërish e sheh të arsyeshme të provosh. Por këmbëngulja, pa vetëreflektim, nuk është forcë, është ngërç!

***

Tentativa nr. 54: ende pa fitues. As ora 22:00 nuk mjaftoi për të ndriçuar mendjen e deputetëve të Kuvendit. 103 deputetë ishin të pranishëm mbrëmë, një sukses logjistik më vete por votimi për formimin e komisionit të fshehtë dështoi sërish. Nga sot, Gjykata Kushtetuese vendos një pauzë ligjore për çdo veprim parlamentar, sepse, siç duket, 30 ditët për të formuar institucione janë thjeshtë një sugjerim miqësor. Nga 27 korriku deri më 8 gusht, deputetët nuk guxojnë të bëjnë asgjë, ndonëse disa do thoshin se kanë ushtruar këtë art të mosbërjes edhe më parë. Vendimi i shumëpritur për të zgjidhur këtë ngërç pritet nga vetë Kushtetuesja.

Është e pakuptueshme se si e kanë logjikuar nevojën për ta thirrur seancën e mbrëmshme kur nuk ka pasur zgjidhje, sa MARRE!

Albulena (emri propozues për kryetare të Kuvendit nga VV), kur e di se je bërë pengesë për funksionimin e një shteti të tërë sepse nuk po zgjedhesh dhe sërish nuk tërhiqesh, a nuk të shkon ndër mend se ndoshta nuk po fiton këmbëngulësia, por po humbet dinjiteti? Apo ndoshta ky ngulm është plotësisht personal, një vullnet i lirë dhe i pastër nga çdo ndikim? Nuk e di. “I remain unconvinced” a?

****

Të martën u dha “Carmeni” i Zhorzh Bizesë, në ekzekutim nga Orkestra e Operës dhe Baletit të Kosovës dhe kori i fëmijëve “Okarina”. Një ngjarje që solli gëzim të veçantë: solistë të përkushtuar, një kor profesional dhe dhjetëra instrumentistë të rinj që dhanë provimin me dinjitet. Jo vetëm për ekzekutimin muzikor, por edhe për faktin që përballuan të nxehtin e padurueshëm në një hapësirë që është më e përshtatshme për xhirime televizive apo koncerte intime, sesa për një vepër operistike me përmasa të tilla.

Por çfarë zgjidhje tjetër ka në këtë qytet?

Teatri Kombëtar është i mbyllur prej katër apo pesë vjetësh dhe askush nuk di të thotë saktësisht pse. Salla e Kuqe nuk i zë më shumë se 200 veta. “1 Tetori” vazhdon të jetë pa asnjë zhveshtore funksionale. Ndërsa “Skënderbeu”, për çudi, ende i mbajnë dekorimet prej druri të festave të fundvitit – si për t’i kujtuar publikut se improvizimi është bërë standard.

Ka, natyrisht, edhe një tjetër sallë: ajo e djegura e Pallatit të Rinisë. U përdor për dy festivale që kushtuan jo pak, por pas tyre nuk mbeti asgjë e qëndrueshme. As ndonjë copë infrastrukturë e rregulluar, as ndonjë plan për vazhdim.

Por më me rëndësi e kemi të shtrojmë pllaka se sa t’i japim hapësirë këtij arti që po lulëzon. Se thot njeri këto parqe i kanë realizu me hapësirë gjelbëruese të mjaftueshme edhe ua bënë hallall disi, por jo, shkojmë përpara me sheshe!

****

Ndërkohë, në SHSKUK nuk ka albumina e as hollues gjaku për pacientë. Por për atë ka një depo përplot me barna e material sanitar të skaduar. Për t’i asgjësuar, buxheti tash duhet t’i ndajë gjysmë milionë euro. Kush e di sa milionë kanë kushtuar dhe në fund? Nuk janë me rëndësi pacientët, as qytetarët. Me rëndësi është biznesi.

Sipas dokumenteve zyrtare të publikuara nga SHSKUK-ja, gjatë vitit 2024 janë gjobitur gjithsej 16 operatorë ekonomikë për mosrespektim të kontratave, ndërsa në gjashtëmujorin e parë të 2025-ës, 30 operatorë. Dokumentet tregojnë se shumica e gjobave janë shqiptuar për mosliferim apo vonesa në dorëzimin e produkteve të kontraktuara.
Pavarësisht këtij historiku, pesë kompani janë shpërblyer me kontrata të reja, që kanë vlera të mëdha.

Shembull, edhe pse e gjobitur vitin e kaluar, kompania “Santefarm” fitoi kontrata mbi 4 milionë euro nga SHSKUK-ja në gjashtëmujorin e parë të 2025-ës. Kompania ishte ndëshkuar me mbi 13 mijë euro për mosliferim të produkteve, por sërish u shpall fituese e disa tenderëve për medikamente të ndryshme.

****

Në jetë, ndonjëherë duhet ta dish kur të ndalesh, kur të reflektosh dhe kur të thuash: ndoshta nuk jam zgjidhja. Dhe ndonjëherë, duhet ta dallosh kur dikush po të shet si sukses një dështim të paketuar bukur.

Sepse mes koncertit të “Carmenit” dhe heshtjes së Kuvendit, mes mungesës së barnave dhe bollëkut të tenderëve, është një mësim i thjeshtë: pa ndershmëri, nuk ka përparim vetëm rrotullim ne vendin e njëjtë.