29 Korrik, 2025

Edhe muzika edhe stili meritojnë vëmendje.

Kur vjen vera, festivalet nuk janë vetëm për playlist-en, por edhe për atë që veshim. Sunny Hill është skena ku moda takohet me identitetin, ku çdo veshje është një deklaratë. Nëse po përgatitesh për të qenë në mesin e turmës (ose para saj), ja disa ide të freskëta që do të të ndihmojnë të dukesh dhe ndihesh fenomenal/e. Më poshtë po rendis disa “copëza” të veshjeve që janë një kombinim midis stilit Y2K, artizanal dhe boho-elegant.

PËR VAJZA

Topa (bluzë) me kopsa të ndryshme, si ai i markës “Ciclo”. Një copë e bardhë me kopsat e gjetura që mund t’ia qepësh (apo të grumbulluara ndër vite) është si një histori e veshur. Minimaliste, por me shumë zemër.

Chunky belts – Rripat e mëdhenj, të errët apo të zbehtë, në lëkurë të trashë ose material të gërryer, janë kthyer fuqishëm. Mbaje sipër një fundi të lirshëm ose mbi një fustan për siluetë të theksuar.

Bangles/ rrathë plastike, transparentë apo pastel – Ato që bien në sy por nuk lodhin. Tre ose katër të mëdha në një dorë dhe ke thënë mjaftueshëm.

 

Byzylykë të artë me perla – Elegancë dhe liri në një kombinim. Vijnë si pjesë e rikthimit të elementeve të artizanatit në modë. Dhe duken magjike në dritën e perëndimit të diellit në festival.

Qafore të gjata dhe të pazakonta – Dy ovale të mëdha, një varëse metalike ose një zinxhir që bie deri në mes të kraharorit. Elegancë për çdo dekolte të hapur.

Balerina Chanel/ këpucë (ose çdo variant klasik) – Sepse këmbët meritojnë rehati, veçanërisht kur kërcimi zgjatë deri në mëngjes.

PËR DJEM

Pantallona të lira dhe këmisha të holla – Në ngjyra neutrale, të bardha të buta apo “beige”, këmisha pa jakë ose të thjeshta. Material liri, pambuku, apo edhe mëndafshi për freski dhe stil.

Rripa të trashë me fibula të pazakonta – Një element që shquhet në veshje, por pa bërtitur. I kombinuar me xhinse apo pantallona të drejta, e bën tërë pamjen të duket më e përkujdesur.

Aksesorë minimalë – Një byzylyk i hollë metalik, një unazë argjendi, apo një varëse e gjatë: detaje që flasin për stilin pa e mbingarkuar atë.

 

Çanta të buta prej suede ose lëkure – Për ditët e nxehta kur duhet të mbashë syzet, kremin e diellit dhe pak gjëra personale. Një çantë e bukur është pjesë e pamjes, jo vetëm një funksion.

Në Sunny Hill, nuk vishesh vetëm për fotografi, vishesh për të ndjerë veten mirë, për të qëndruar në kujtim dhe për të treguar kush je. E këtë vit, kombinimi ideal është: prakticitet + detaj + karakter.