1 Gusht, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditëve të shkuara dhe domethënien e tyre për ne! Artikulli është përmbledhje javore me lajme që kryesuan javë  dhe bëhen një me ty kur ndajmë lajmet e njëjta në Kosovën tonë. Paper ndanë me ty!

Gjeni kohë për të nuhatur trëndafilat sepse në ngutjen për të arritur gjithçka, shpesh harrojmë të ndalemi e të jetojmë. Në mes të detyrimeve, listave të pafundme dhe qëllimeve të mëdha, fshihet bukuria e jetës në detajet më të vogla. Sepse jeta nuk është vetëm në atë që ndërtojmë, por edhe në atë që ndjejmë përgjatë rrugës. 

Çka ndodhi dje në Kosovë?

Festivali “Sunny Hill” fillon sot dhe padyshim është një nga ngjarjet më fitimprurëse për Kosovën në muajin gusht.

Dua Lipa është shqiptarja më e famshme e gjallë, kurse, gjithashtu, Dua Lipa e prezanton Kosovën dhe popullin shqiptarë, teksa ja ka dalë të sjellë në Kosovë njerëz nga e gjithë bota.

Në vizitën e saj dje në presidencë, tek presidentja Vjosa Osmani, ajo mori shtetësinë e Kosovës. Dua erdhi në shtëpi duke e dashur vendin e saj ashtu siç është.

***

ZRRE-ja kishte vendosur që të gjitha bizneset me mbi 50 punëtorë ose me mbi 10 milionë euro qarkullim në vit, nga 1 qershori 2025, të mos furnizohen më me energji përmes tregut të rregulluar (pra përmes çmimit të garantuar), por të zgjedhin vetë një furnizues në tregun e lirë.

Bizneset kishin një afat 60-ditor tranzitor për ta bërë këtë kalim.

Kompania Proex e kundërshtoi këtë vendim në gjykatë, duke thënë se është i paligjshëm.

Dhe tani?

Gjykata Komerciale e ka anuluar këtë vendim, duke e bërë të pavlefshëm njoftimin e ZRRE-së.

Sipas juristëve, ky vendim nuk vlen vetëm për kompaninë Proex, por për të gjitha bizneset që janë prekur nga njoftimi.

Kjo do të thotë që bizneset nuk janë më të detyruara të kalojnë në tregun e hapur të energjisë, për momentin.

Pra, vendimi i gjykatës ndalon përkohësisht detyrimin e bizneseve të mëdha që të gjejnë vetë furnizuesin e energjisë elektrike në tregun e hapur, duke e shpallur njoftimin e ZRRE-së si të pavlefshëm.

***

Ministrja në detyrë e Drejtësisë, Albulena Haxhiu, ka kritikuar ashpër Gjykatën Speciale në Hagë për shkak të një vendimi të saj për të pranuar si prova dokumente të dërguara nga autoritetet e sigurisë së Serbisë në rastin kundër ish-krerëve të UÇK-së (Hashim Thaçi, Kadri Veseli, Rexhep Selimi e Jakup Krasniqi).

Ajo thotë se Gjykata ka humbur legjitimitetin kushtetues, edhe pse vepron në bazë të ligjeve të Kosovës.

E në protestën e 7 gushtit të thirrur nga Organizata e Veteranëve të UÇK-së, a do të dalësh, e dashur ministre?

Në pjesën e kauzave të kësaj proteste renditet po kjo arsyeje, padrejtësia ndaj ish-krerëve të UÇK-së, por edhe mungesa e konstituimit të Kuvendit, ndërprerja e përbuzjes ndaj kategorive të luftës, përfshirë mosmbështetjen financiare, përjashtimin e veteranëve nga paga minimale dhe mungesën e ligjit për vlerat e UÇK-së.

***

Dashuria është si lulet e egra, ajo nuk rritet gjithmonë në toka të punuara me kujdes, as nuk ndjekë rregullat e kopshtit. Ajo lulëzon në rrënoja, në zemra të thyera, në situata të ndërlikuara dhe pikërisht aty ku bota mendon se nuk mund të ketë jetë, ajo shfaqet me një forcë të çuditshme, delikate por e palëkundur. Dashuria e vërtetë, si lulet e egra, nuk kërkon vëmendje për të qenë e bukur, mjafton që të ekzistoj.