22 Gusht, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditëve të shkuara dhe domethënien e tyre për ne! Artikulli është përmbledhje javore me lajme që kryesuan javë  dhe bëhen një me ty kur ndajmë lajmet e njëjta në Kosovën tonë. Paper ndanë me ty!

Jeta nuk është e shkurtër, por ne shpesh e shpërdorojmë atë. Ne e humbim në grindje pa kuptim, në dëshira që nuk na shërbejnë dhe në frikën e asaj që ende s’ka ndodhur. Nuk është koha ajo që na mungon, por mënyra si e përdorim atë. Çdo ditë është e mjaftueshme për të jetuar me virtyt, nëse nuk e shpenzojmë kot.

Çka po ndodhë këto ditë në Kosovë?

Dikush merret me liberalizimin e tregut të energjisë, dikush merr merita për vendimin e Komisionit Qendror të Zgjedhjeve për të mos e certifikuar Listën Serbe, qytetarët që nuk i pyet askush i pret shtator me obligime. Dikë sigurimi i drunjëve/peletit/thëngjillit, kush ka fëmijë e ka gajle aplikimin për subvencionim të materialeve shkollore, e tash qite në ekuilibër kujt i duhet të mendohet për zgjidhje afatgjate, e kujt veç sa për me largu vëmendjen prej aktualitetit (6 muaj pa Kuvend).

***

Të enjten, Komisioni Qendror i Zgjedhjeve e refuzoi certifikimin e Listës Serbe për pjesëmarrje në zgjedhjet lokale të 12 tetorit, pas kundërshtimeve nga anëtarët e Lëvizjes Vetëvendosje që publikuan dokumente që tregonin se kandidatë të Listës Serbe për kryetarë komunash apo asamblistë, mbajnë pozicione në organet paralele të Serbisë në Kosovë. Pro certifikimit votuan dy anëtarë të KQZ-së, dy të VV-së ishin kundër, ndërsa shtatë nga partitë tjera abstenuan.

E pse në zgjedhjet parlamentare Lista Serbe kandidoi si një “lloj zonje e vërtetë”, pa u pengu prej askujt? Edhe së dyti a është kjo punë e KQZ-së?
Kur deri sot Lista Serbe nuk është shpallur organizatë terroriste, ashtu siç e thekson ligji ku çdo parti e regjistruar certifikohet automatikisht, përveçse kur nuk i plotëson kërkesat administrative, çysh po ndodhka tash?

***
Paramendojeni Serbia u kall prej protestave, ama presidentit Aleksandër Vuçiq i del koha me falenderu presidentin e Venezuelës, Nicolas Maduro, me një telefonatë, që shteti i tij nuk e ka njohur Kosovën.

E për këtë të fundit Shtetet e Bashkuara të Amerikës e kanë rritur në 50 milionë dollarë shpërblimin për arrestimin e Nicolas Maduros, duke e akuzuar atë si një nga narkotrafikantët më të mëdhenj në botë.

Tri anije luftarake amerikanë janë nisur drejt ujërave afër Venezuelës, ndërsa Maduro ka paralajmëruar se do të vë në gatishmëri rreth 4.5 milionë anëtarë të milicisë si reagim ndaj kërcënimit amerikan.

***

Dy ditë pasi dështuan në dy propozime të ndryshme, deputetët e legjislaturës së nëntë do të mblidhen sërish në tentimin për ta zgjedhur kryeparlamentarin. Me fillim prej orës 11:00, deputetët do të mblidhen në seancën e dytë pas publikimit të aktgjykimit të Gjykatës Kushtetuese, që i obligon ta zgjedhin kryeparlamentarin në votim të hapur e për 30 ditë.

Çfarë propozimesh do të kemi sot? A kthehet njeri në propozimin e njëjtë edhe pse si ka votat?

***

Është hapë me 20 gusht ekspozita e Lum Hajrullahu dhe Festa Ramoja në Europe House Prishtinë, e kuruar nga Laureta Hajrullahu dhe Shkamb Jaka, “Vështrime të reja”. Sipas kuratorëve, ekspozita prezanton dy perspektiva unike që kapin intensitetin e papërpunum të mënyrës se si rinia e sheh botën. Nga momentet intime e njerëzore deri te horizontet e largëta, këto punime na kujtojnë se vizioni rinorë gjithmonë përjetohet me qartësi dhe emocion të thellë.

***

I dashur lexues, çdo ditë është një ekuilibër mes mbajtjes dhe lëshimit. Disa gjëra duhen mbajtur pranë zemrës: dashurinë, të vërtetën, kujtimet që të japin forcë. Por disa gjëra duhet t’i lëshojmë, ndryshe pesha e tyre na fundosë dhimbjen, krenarinë e kotë, frikën që s’ka rrënjë. Ne jemi urë mes dy lëvizjeve të dorës që shtrëngon fort dhe dorës që hapet lirshëm. Vetëm aty gjendet paqja së pari me veten pastaj me tjerët!