Rrënjët në ferr, degët në parajsë! Dje n’Kosovë

Paper Radio
ON AIR
91.1 Prishtinë
91.1 Podujevë
91.1 Fushë Kosovë
91.1 Artanë
91.1 Kastriot
91.1 Graçanicë
91.1 Drenas
91.1 Lipjan
91.1 Tiranë/Dajt
101.8 Durrës
104.1 Fier
102.7 Vlorë
88.9 Himarë
88.6 Sarandë & Ksamil

Ngjarje drejtpërdrejt nga Prishtina

LIVE

8 Dhjetor, 2024

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditës së djeshme dhe domethënien e tyre për ne! Artikujt janë ditorë dhe bëhen një me ty kur ndajmë përditshmërinë e njëjtë në Kosovën tonë. Paper ndanë me ty!

Lexues, përsërite këtë pas meje: Mua nuk më përcakton si njeri ajo çfarë më ka ndodhur. Unë jam ajo çka unë zgjedh të jem. Vizioni im do të jetë më i qartë kur njoh thellësinë e zemrës sime. Nëse shoh jashtë saj, do të jetë ëndërr; nëse mësohem të shoh brenda saj, do të zgjohem. ☼

Ja çka e karakterizoi ditën e djeshme në Kosovë:

Në Paris janë mbledhur një numër i madh liderësh botërorë për nder të ceremonisë së rihapjes së katedrales Notre Dame. Në këtë ceremoni po merr pjesë edhe presidentja Vjosa Osmani, e cila ka pasur një moment shtrëngimi duarsh me presidentin amerikan Donald Trump.

Në vitin 2019, kur katedralja 850-vjeçare ishte djegur, Kosova kishte dhuruar 20 mijë euro në shenjë solidarizimi, në kohën e kryeministrit Ramush Haradinaj. Ceremonia e rihapjes pritet të zgjasë disa ditë.

Aktakuza ndaj Hashim Thaçit

Aktakuza e ngritur deri tash ndaj ish-kreut të UÇK-së, Hashim Thaçi, nga Dhomat e Specializuara nuk ishte e mjaftueshme, ndaj duhej diçka që e rëndonte edhe më shumë situatën. Të premten, ndaj tij u ngrit një aktakuzë tjetër, e cila ishte evidentuar nga prilli i 2023 deri në nëntor të 2023, nën pretendimin e gjykatës se Thaçi ka ndarë emrat e dëshmitarëve me vizitorët e tij.

Pse u prit një vit që të publikohej kjo akuzë, meqenëse paska qenë e ditur që prej një viti? A lidhet kjo me revoltimin e z. Thaçi në seancën e para disa ditëve, apo thjesht tani u pa e arsyeshme të bëhej publike aktakuza 16-faqëshe?

Kush do të luajë rolin e opozitës?

Tash, me aderimet e reja politike, fushatën në diasporë dhe agjendat e turneve, kush do të luajë rolin e opozitës për çështjet aktuale?

I tërë ai eksploziv i gjetur në veri të vendit, për sulmin që ndodhi në Ibër-Lepenc, a nuk do të vazhdojë të jetë temë debatesh në audiencë, ashtu siç do të duhej? Tash që bypass-i i kanalit ka përfunduar dhe sanimi i përhershëm do të vazhdojë, me përgjegjësinë kush do të merret? KFOR-i, EULEX-i, policia jonë, ndonjë bashkëpunim tjetër?

Kulturë

Mbrëmë ka përfunduar nata finale e festivalit Kënga Magjike 2024, ku çdo vit mblidhen këngëtarë nga të gjitha trevat shqipfolëse dhe konkurojnë me këngët e tyre. Këtë vit, fitues dolën Rozana Radi dhe këngëtari grek, Sany, me këngën Akoma.

Çfarë është kjo dashuri e shqiptarëve ndaj grekëve? Tash e disa vite, festivali ka kthyer performimin live të artistëve, gjë që është shumë më e kënaqshme. Sido që të jetë, ky është ndër festivalet e rralla shqip me këtë volum. Ndaj është për t’u duartrokitur për vullnetin e përvjetshëm, pavarësisht politikave të festivalit.

Mesazhi për lexuesin:

Nëse rruga ku je ti, lexues, është pa sfida dhe gjemba drejt qëllimeve tua në jetë, atëherë ajo nuk është rruga jote dhe ti po ecën në rrugën e tjetrit. Asnjë pemë nuk është rritur në parajsë, nëse njëherë nuk ka lëshuar rrënjët në ferr!