20 Janar, 2025

Në kryeqytetin e Shteteve të Bashkuara, ku historia dhe simbolika bashkohen në çdo hap, një faqe e re po shkruhet në librin e demokracisë amerikane.

Donald Trump, ky protagonist që ngjalli debate dhe ndau opinione, sot ngjitet në skenën më të madhe politike të vendit për t’u betuar si presidenti i 47-të i SHBA-së.

Në një ditë me tension dhe pritshmëri të kombit amerikan, ceremonia e inaugurimit po shndërrohet në një moment kyç që do të përcaktojë bazamentin e një mandati të ri për administratën Trump.

Në Uashington, siguria është rritur ndjeshëm.

Me uniforma sigurie dhe barrikada që shënojnë rrugët, Uashingtoni është kthyer në një fortesë simbolike, duke ngjallur shpresat për stabilitet politik.

Por, përtej barrikadave dhe masave të sigurisë, emocionet e kësaj dite janë të ndërlikuara: një përzierje shpresash, skepticizmi dhe kurioziteti për atë që do të vijë.

Analistët në SHBA presin që fjalimi i inaugurimit të Trump-it të jetë një manifest politik që do të përcaktojë rrugëtimin e tij në katër vitet e ardhshme.

Ekipi përgatitor kaloi katër muaj duke rregulluar vendin inaugurues në Rotunda dhe në Capitol One Arena. Gati një çerek milioni njerëz kanë blerë bileta për inaugurimin e Trump-it, shumë prej të cilëve nuk do të jenë në gjendje të marrin pjesë në ngjarjet e brendshme për shkak të kapacitetit të kufizuar.

Inaugurimi pritet të mbahet në orën 12:00 (me orën lokale të Amerikës) ose në orën 18:00 (me kohën lokale të Kosovës).

Hapësira inauguruese zakonisht rezervohet për presidentin, nënpresidentin dhe familjet e tyre; kryetarin dhe gjyqtarët bashkëpunëtorë të Gjykatës së Lartë; ish-presidentët; trupin diplomatik; anëtarët dhe të emëruarit e kabinetit; anëtarët e Kongresit; guvernatorët dhe shefat e përbashkët të shtabit.

Pavarësisht kufizimeve të hapësirës, aty do të marrin pjesë edhe CEO i Tesla, Elon Musk; CEO i Meta, Mark Zuckerberg; dhe themeluesi i Amazon.

Po ashtu, i ftuar është edhe nënpresidenti i Republikës Popullore të Kinës, Han Zheng.

Gjatë gjithë aktiviteteve të ditës do të performojnë disa artistë të njohur.

Ylli i muzikës country, Carrie Underwood, do të këndojë “America the Beautiful” gjatë ceremonisë së betimit.

“Unë e dua vendin tonë dhe jam e nderuar që më është kërkuar të këndoj në inaugurim dhe të jem një pjesë e vogël e kësaj ngjarjeje historike,” tha Underwood në një deklaratë të dhënë për NPR.

Tenori klasik Christopher Macchio do të interpretojë himnin kombëtar gjatë ceremonisë së betimit.

Në mbrëmje, në Liberty Ball, do të performojë këngëtari dhe kantautori Jason Aldean, si dhe këngëtarja Nelly.

Në fund të mbrëmjes, këngëtari Gavin DeGraw do të performojë në Starlight Ball.