21 Janar, 2025

Adhurues të dimrit ose jo, çfarë thonë psikologët për personalitetin tuaj!

Stina e dimrit, me bardhësinë e borës dhe ajrin e ftohtë por të pastër, ngjall ndjenjë të jashtëzakonshme.

Sikur çdo stinë tjetër, edhe kjo i ndanë njerëzit në dysh.

Ata që e adhurojnë dhe pjesa tjetër që nuk e durojnë dot.

Studimet empirike tregojnë se preferencat për dimrin lidhen ngushtë me personalitetin, përvojat jetësore dhe mënyrën se si njerëzit e perceptojnë botën përreth.

Ata që e duan dimrin, portretizohen si persona me kreativitet si dhe me një dashuri për rehatinë dhe thjeshtësinë.

Për ta, dimri është më shumë se një stinë, është një përvojë emocionale dhe shpirtërore.

Dimri, bazuar në ndjesitë e tyre, ofron një atmosferë unike, ku natyra e heshtur dhe peisazhet e bardha krijojnë një ndjenjë paqeje.

Për shumë njerëz, kjo qetësi ndihmon në reflektim dhe rilidhje me veten.

Shëtitjet në borë, sportet dimërore, pse jo edhe momentet e ngrohta pranë zjarrit, janë momente kënaqësie për ta.

Kjo kategori, sipas përceptimit psikologjik, janë persona tipik aventurierë, por gjithashtu vlerësojnë momentet e thjeshta dhe intime.

Disa studime tregojnë se personat që e pëlqejnë dimrin janë më të qëndrueshëm emocionalisht dhe ndihen më energjikë në temperaturat e ulëta.

Por, e kundërta e tyre, janë grupi i njerëzve që e shohin dimrin si barrë dhe stinë që sjellë lodhje.

Këta persona, sipas psikologëve, njihen si dikush që ka lidhje të fortë me natyrën aktive gjatë ditëve të ngrohta.

Për ta, dimri bëhet pengesë për aktivitetet e përditshme.

Madje ka të tillë, që përjetojnë ulje të humorit gjatë dimrit, një gjendje që në terma mjekësor njihet si Çrregullimi Afektiv Sezonal.

Për ta, errësira dhe moti i ftohtë sjellin lodhje dhe mungesë motivimi.

Psikologët, këtë kategori i përshkruajnë si njerëz që e duan lirinë e lëvizjes dhe dritën e diellit, e cila mes tjerash ndikon pozitivisht në humorin dhe energjinë e tyre.

Preferenca për stinën e dimrit, shpesh lidhet me mënyrën se si ne e perceptojmë komoditetin, sfidat dhe bukurinë e jetës.

Pavarësisht gjithçkaje, dimri mbetet një stinë e veçantë që na kujton dinamika të ndryshme të jetës.

Nëse je adhurues i borës apo adhurues i diellit, megjithatë kjo stinë ka diçka të veçantë për të ofruar.

Së paku, një moment reflektimi në qetësi apo një arsye për të ëndërruar ditët e ngrohta që do të vijnë.