20 Mars, 2025

Në ujërat e qeta të Liqenit të Mavrovicës, në Maqedoni aty ku dielli lind duke u pasqyruar mbi ujë dhe nata mbështjellë gjithçka me heshtje, një garë e vërtetë do të zhvillohet me kallama në dorë dhe durim të hekurt.

Carp Team 01 nga Prishtina, një ekip i formuar tash e shtatë vite, është gati të sfidojë veten dhe kundërshtarët në një nga garat më të rëndësishme të peshkimit në rajon. Peshkimi për ta nuk është vetëm një sport, por një ritual, një meditim mbi ujë, një përballje mes njeriut dhe natyrës.

Dy sfida, një synim: kualifikimi në botëror

4 prill, nisja e sfidës!

Carp Team 01, së bashku me 20 ekipe të tjera nga Kosova, do të marrin pjesë në garën e parë në Liqenin e Mavrovicës. Gara nisë të premten në orën 09:00 dhe vazhdon pa ndërprerje për 52 orë, deri të dielën në orën 15:00 pasdite. Kjo është një sfidë që teston qëndrueshmërinë fizike dhe psikologjike të garuesve – pa gjumë, me orë të tëra pritjeje dhe momente adrenalinë!

11 maj, gara e dytë

Në të njëjtin liqen, do të zhvillohet gara e dytë dhe pikët e grumbulluara nga të dyja fazat do të përcaktojnë se cilat ekipe do të fitojnë të drejtën për të marrë pjesë në kampionatin botëror të peshkimit.

Si matet suksesi?

Vetëm peshqit me peshë mbi 1 kg llogariten në rezultatet finale.
Sa më i madh peshku, aq më shumë pikë!

Një ekip i përgatitur mirë nuk është ai që kap vetëm një peshk të madh, por ai që menaxhon taktikisht gjithë garën – duke zgjedhur vendin e duhur, ushqimin ideal dhe momentin perfekt për veprim.

Pse është kjo garë kaq speciale?

Një lidhje me natyrën, ky sport nuk ka të bëjë vetëm me krapin, por me qetësinë, përqendrimin dhe ndjenjën e plotë të lirisë që vjen kur je në mes të natyrës.

Një sfidë e karakterit, një peshkatar i mirë nuk ka nevojë vetëm për fat, por për mençuri, durim dhe intuitë.

Një bashkësi që ndanë të njëjtin pasion, nuk është thjeshtë një garë, por një vend ku peshkatarët ndajnë përvoja, strategji dhe momente të paharrueshme.

A do të shohim një rekord të ri këtë vit?

“Carp Team 01 është gati. 52 orë peshkim pa ndërprerje. Asnjë kompromis me pasionin. Sepse peshkimi nuk është vetëm një sport – është një mënyrë e të jetuarit”, tha Labinot Haziraj, anëtar i Carp Team 01 dhe pasionuar pas peshkimit.

Carp Team 01 tashmë e ka lënë shenjën e vet në ujërat e Mavrovicës.

Peshku më i madh që kanë kapur ndonjëherë? Një gjigant 22 kg, po në Liqenin e Mavrovicës. Një moment që ka mbetur në histori për ekipin dhe që tani, me një përgatitje të përmirësuar dhe eksperiencë më të madhe, ata synojnë ta thyejnë këtë rekord.