22 Shkurt, 2025

Shkruan: Erletë Rrustemi

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditës së djeshme dhe domethënien e tyre për ne! Artikujt janë ditorë dhe bëhen një me ty kur ndajmë përditshmërinë e njëjtë në Kosovën tonë. Paper ndanë me ty!

Rrethanat kanë ndryshuar në mënyrë substanciale. Bëj diçka çdo ditë, pa marrë parasysh çfarë. Asgjë nuk do të ndodhë nëse nuk fillon së pari një proces shkak-pasojë. Kjo fillon me një veprim. Rindiz mundësinë e mundësive. Rindize atë me lojë.

Çka ndodhi dje në Kosovë?

Ka mbetur vetëm një vendvotim pa u procesuar nga gjithsej 2,533 në listën e rezultateve për kandidatët për deputetë dhe subjektet politike nga zgjedhjet e 9 shkurtit.

Vendvotimi i vetëm nga i cili nuk janë përditësuar të dhënat është në komunën e Mitrovicës, ku deri tani janë procesuar 104 nga 105 vendvotimet.

Nga procesimi i 99.96% të vendvotimeve nga numërimi në qendrat komunale, sipas uebfaqes së Komisionit Qendror të Zgjedhjeve, Lëvizja Vetëvendosje ka marrë 40.90% të votave. Partia Demokratike e Kosovës është e dyta me 22.03%, ndërsa Lidhja Demokratike e Kosovës e treta me 17.64%. Koalicioni AAK-Nisma është subjekti i katërt që ka siguruar kalimin e pragut me 7.46%.

Nëse votat përfundimtare nuk sjellin shumë ndryshim, atëherë VV-së i mbesin disa alternativa për ta mbajtur pushtetin: ta “peshkojë” dikë nga ndonjë parti tjetër ose të lidhë koalicion me PDK-në apo LDK-në për një qeveri më stabile. Alternativa tjetër është të mos e formojë fare qeverinë dhe të dalë në opozitë.

***
Ish-“Kino Rinia” prej vitit 2021 është në Listën e Trashëgimisë Kulturore nën mbrojtje të përkohshme, por inaugurimi i saj u bë në vitin 1952. Ndërsa funksioni i saj vitet e fundit ka qenë shpeshherë i papërcaktuar.

Në javën e parë të shkurtit, Kino Rinia u përfshi nga zjarri. Tani, MRKS ka filluar vlerësimin e dëmeve të shkaktuara.

Ky institucion ka bërë të ditur se nga zjarri i shkaktuar është dëmtuar kulmi i ndërtesës, veçanërisht në pjesën më të madhe të sallës së vogël, e cila ndodhet në katin e parë të ndërtesës.

Mos u përqendro te ajo që të tjerët mund të bëjnë për ty, por mendo dhe vepro për atë që mund të bësh ti për ta. Vetëm duke dhënë, ndihmuar dhe kontribuar, mund të krijosh një botë më të mirë rreth vetes.