18 Shkurt, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditës së djeshme dhe domethënien e tyre për ne! Artikujt janë ditorë dhe bëhen një me ty kur ndajmë përditshmërinë e njëjtë në Kosovën tonë. Paper ndanë me ty!

Mirëmëngjesi i dashur lexues, në Kosovën 17 vjeç e një ditë. Dita e djeshme më solli në mendje një vlerë të njerëzve që nganjëherë harroj ta vlerësoj: të buzëqeshësh edhe atëherë kur nuk të vjen të buzëqeshësh. Asnjëherë më shumë se pavarësia, nuk ma rikujton se pas sa shumë dhimbjeve shqiptarët provojnë të qeshin. Ju dua!

Mes festës dhe bashkimit përmes fjalëve në ditët e pakta shtetërore, kujtojmë paraprakisht disa fakte që ndodhën para 17 viteve, në datën historike, e që asnjë brez nuk duhet harruar.

Deklarata e pavarësisë së Kosovës u shënua vetëm një natë para shpalljes së pavarësisë. Në të u punua tërë natën nga profesori i ndjerë, Shyqyri Nimani.

Ajo u shënua në bashkëpunim me ndihmën e aleatëve ndërkombëtarë, në atë formë që nëse pavarësia e Kosovës do të dërgohej në Gjykatën Ndërkombëtare të Drejtësisë, gjithçka të ishte në përputhje me vërtetësinë e shtetësisë së Kosovës. Ashtu siç edhe ndodhi në 2011.

Andaj, jo rastësisht në deklaratë nuk shkruhej që pavarësia po shpallej nga Institucionet e Përkohshme, por shkruhej:

Ne, udhëheqësit e popullit tonë, të zgjedhur në mënyrë demokratike, nëpërmjet kësaj Deklarate shpallim Kosovën shtet të pavarur dhe sovran.

Pra, nga udhëheqësit e popullit.

Detajet e pavarësisë ishin menduar në çdo skenar të mundshëm që potencialisht mund të ndikonte në sabotimin e kësaj dite.

Ekipa e përzgjedhur nga kryeministri i atëhershëm, Hashim Thaçi, për organizimin dhe mbikëqyrjen e ngjarjeve të kësaj dite ishin Vlora Çitaku dhe Bekim Qollaku.

***

Të kthehemi tani te dita e djeshme, në kohën e tashme.

Dje, në organizimet shtetërore, në parakalimin e Gardës së FSK-së, u mbajtën fjalime nga udhëheqësit shtetërorë.

Mes disa huqjeve të protokolleve shtetërore, si vënia mbrapsht e flamurit shtetëror në shtizë, në fillim të ditës, pati diçka që u fillua me këmbë të mbarë.

Kryeministri në detyrë, Albin Kurti, i njohur për fjalimet e tij të zemrës, dje tregoi unitet.

Në fjalimin e tij para parakalimit të FSK-së, ai ka thënë se Republika është akti i të zgjedhurve të Kosovës, me krerët që kanë qenë në pozitë atë kohë, duke përmendur të gjithë ata që kanë pasur meritat e tyre në pavarësinë e Kosovës.

“Republika e Kosovës është rezultat i aktit suprem të brezit më të ri të të zgjedhurve të popullit të saj, emrat e përveçëm të të cilëve lexohen pas firmave të nënshkruara në Deklaratën e Pavarësisë më 17 shkurt 2008 nga 109 deputetë të Kuvendit, dhe nga krerët e asaj kohe: presidenti Fatmir Sejdiu, kryekuvendari Jakup Krasniqi dhe kryeministri Hashim Thaçi,” ka thënë Kurti.

***

Me vëmendjen që gëzon së fundmi, dje vëmendjen e mori edhe emisari për misione të posaçme, Grenell.

Pasi uroi ditën e Pavarësisë së Kosovës, duke shprehur shqetësim për “padrejtësinë e madhe” që Hashim Thaçi, ish-Presidenti i vendit, mbetet në paraburgim dhe është në pamundësi për të festuar (deklaratë e rëndësishme për tu lëshuar tash nën administratën e re), llogaria në rrjetin social “X” e emisarit të Posaçëm për Misione të Posaçme të SHBA-së, Richard Grenell, u përball me një valë komentesh negative.

Shumë prej tyre – kryesisht serbë – përdorën gjuhë të ashpër dhe ofendime të rënda në përgjigje të postimit të ish-emisarit për Ballkanin.

***

Nuk mbaj mend në vitet e fundit të përvjetorëve të pavarësisë të ketë pasur kaq shumë njerëz, pavarësisht motit të ftohtë që ishte dje.

***

Ditë të mira i presin Kosovën tonë, lexues i dashur. Sepse në ditë të pakta, mes realitetit të zënë, kujtoj sa shumë gjëra të mira kanë ndodhur për tu gëzuar në këto vite. Ditë të mira na presin, sepse gjithçka që bëjmë nga thellësia e zemrës është e bërë mirë.