31 Korrik, 2025

Shkruan: Erletë Rrustemi

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditëve të shkuara dhe domethënien e tyre për ne! Artikulli është përmbledhje javore me lajme që kryesuan javë  dhe bëhen një me ty kur ndajmë lajmet e njëjta në Kosovën tonë. Paper ndanë me ty!

Disa gjëra nuk ndodhin, jo sepse ke gabuar por sepse për ty ka një rrugë tjetër më të sigurt. Ka raste kur jeta të largon nga një derë që nuk duhej hapur, edhe pse ti nuk e kupton menjëherë. Është e vështirë të besosh në mes të pasigurisë, por ndonjëherë mbrojtja dhe udhëzimi vijnë në formën e një dështimi, një refuzimi, një rruge që nuk u hap. Mos u frikëso nga ato që nuk ndodhin, ndoshta ato ishin vetëm mënyra e jetës për të të mbajtur afër asaj që të përket me të vërtetë.

Çka ndodhi dje në Kosovë?

Presidentja e Kosovës, Vjosa Osmani, njoftoi se administrata Trump (në vitin 2025) ka konfirmuar vazhdimin e Programit MCC (Millennium Challenge Corporation) për Kosovën, duke mbështetur implementimin e grantit prej 202 milionë dollarësh për sektorin e energjisë, ndonëse programi ishte iniciuar gjatë administratës Biden. Llogaritet se ky grant është pjesë e një pakete totale prej 236.7 milionë  dollarë, ku shtohet edhe kontributi shtetëror i Kosovës prej 34.7 milionë  dollarë.

Sipas informacionit, vendimi u mor pas takimit të Osmanit me zëvendëssëkretarin amerikan të shtetit, Christopher Landau, i cili luajti rol kyç në vendimmarrjen për vazhdimin e memorandumit të MCC Compact me Kosovën.

Raportohet se fondi në vlerë 202 mln dollarë është siguruar nga MCC, dhe 34.7 mln dollarë nga qeveria e Kosovës, për një total 236.7 mln dollarë për programin që është në fuqi që nga prilli i vitit 2024.

MCC, jep grante të mëdha investimi për vendet në zhvillim.

Financimet e saj quhen “Compacts” dhe përdoren për projekte afatgjata, shpesh në energji, infrastrukturë, bujqësi, qeverisje të mirë dhe arsim profesional.

***

Banka Qendrore e Republikës së Kosovës (BQRK / CBK) njoftoi se shërbimi “Apple Pay” është bërë tashmë i disponueshëm për përdoruesit në Kosovë. Bankat dhe institucionet financiare mund të lidhin kartat e tyre me platformën “Apple Pay” për pagesa të shpejta, të sigurta dhe pa kontakt përmes pajisjeve të kompanisë “Apple” (iPhone, Apple Watch etj).

Ky është një hap tjetër drejt digjitalizimit të sistemit të pagesave në përputhje me standardet evropiane, pas lançimit të “Google Pay”. CBK thekson se ky proces është rezultat i bashkëpunimit të ngushtë mes CBK-së, sektorit bankar dhe partnerëve ndërkombëtarë, përfshirë Ambasadën e SHBA-së në Kosovë.

***

Një javë intensive, plot nota, frymë dhe pasion, solistët e rinj që patën privilegjin të punojnë për shtatë ditë rresht me legjendën e operës, Ramon Vargas sollën për publikun e Prishtinës një mbrëmje për t’u mbajtur mend.

Koncerti “New Generation”, që tashmë është kthyer në një traditë të dashur brenda Festivalit Ndërkombëtar të Operës – RLIOF, u mbajt në ambientet e Fakultetit të Arteve, ku të rinjtë treguan gjithçka që kishin mësuar nga mjeshtri me famë botërore. Vepra të mëdha të repertorit operistik ndërkombëtar u sollën me ndjenjë, fuqi dhe freski si një përplasje frymëzuese mes klasikës dhe energjisë së brezit të ri.

Ky koncert është vetëm një kapitull i shkëlqyer në maratonën e netëve të edicionit të pestë të Rame Lahaj International Opera Festival. E martja mbrëma kulmoi me duartrokitje të gjata nga një sallë plot artdashës si një shpërblim i merituar për punën e palodhshme dhe përkushtimin e të rinjve që po ndërtojnë zërin e së ardhmes.

***

E them shpesh dhe kur e lexon nga fjalët e para mund të bezdisesh por më beso… nuk thuhet “sa keq, sa e keqe, sa e pamëshirshme, sa e pashpresë është jeta” vetëm pse dikush në punë të nervozoi, vetëm pse pate një debat me shokun/shoqen e ngushtë, sepse në mbrëmje ajo ndërron kahje, bëhet më e mirë kur dikush ta kujton sa erën e mirë e ka dhoma jote, si ja kujton fëmijërinë dhe momentet që keni kaluar bashkë! Të paktën për disa sekonda për t’u ndjerë të tillë!