3 Mars, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditës së djeshme dhe domethënien e tyre për ne! Artikujt janë ditorë dhe bëhen një me ty kur ndajmë përditshmërinë e njëjtë në Kosovën tonë. Paper ndanë me ty!

Mirëmëngjesi, lexues! Të uroj javë të mbarë, e nëse prej angazhimeve ditore i ke harruar thesaret e jetës, më lejo t’i rikujtoj: koha, shëndeti, koka rehat, mëngjeset e qeta, mundësia për të udhëtuar, pushimi pa u ndjerë fajtor, gjumi i mirë… e disa të tjera t’i kujtoj më poshtë.

***

Çka e karakterizoi ditën e djeshme në Kosovë?

Po, Oscars janë mbajtur mbrëmë, por ne kemi qenë të zënë me dramat tona aq shumë, ndryshe nga njëra-tjetra, sa që çdo ditë del një skandal ose ndonjë risi për t’u marrë me të.

Të premten, më 28 shkurt, Jelena Gjukanoviq u arrestua në rajonin e Mitrovicës, nën dyshimet se kishte kryer aktivitete të spiunazhit për BIA-n. Si u zbulua dhe si u arrit te provat që çuan në akuzë, nuk dihet.

Dje, të premten, asaj iu caktua masa e paraburgimit prej një muaji.

Nga mediat u raportua se Gjukanoviq ishte punonjëse e Organizatës për Bashkëpunim dhe Siguri në Evropë (OSBE).

Lidhur me këtë rast ka reaguar edhe misioni i OSBE-së në Kosovë. Në reagimin e tyre, ata thonë se janë në dijeni për rastin, bazuar në raportimet e mediave, dhe se janë në kontakt me përfaqësuesin e tyre ligjor, por nuk duan të japin më shumë detaje!

***

Ja një atraksion tjetër,

Teksa qendra e numërimit di të shndërrohet edhe në hapësirë ku përfaqësuesit politik i kërkojnë llogari njëri-tjetrit në ato që funksionojnë vetëm për numërim, befasues po del fakti se sa mirë ka performuar LDK-ja në 30% të votave të numëruara me postë. Aq mirë, sa që nëse vazhdon kështu, mund t’ia marrë atë deputetin që ia mori PDK-ja me votat brenda Kosovës.

LVV-ja vazhdon të jetë e para me shumicën e votave me postë, por është dukshëm larg nivelit të përkrahjes që pati në votat në përfaqësimet diplomatike.

LVV-ja është afër sigurimit të 49 mandateve, por që ta arrijë këtë, duhet të fitojë mbi 60% të të gjitha votave me postë.

S’është larg mendsh që kjo parti mund të arrijë edhe në 50 mandate në rast se fiton mbi 70% të votave me postë.

***

Që nga 27 shkurti, DokuFest, Kino Armata dhe Kinemaja Jusuf Gërvalla kanë prezantuar shfaqje të veçanta të dokumentarëve të nominuar për Oscar, për nder të ceremonisë së ndarjes së çmimeve, ku sivjet Kosova nuk mori pjesë fare për disa arsye të email-ve. Në Prizren, Prishtinë dhe Pejë, në ekranin e madh janë shfaqur këta filma:

Më 27 shkurt, filmi Sugarcane, që tregon për zbulimin e varreve të pashënuara dhe trashëgiminë tragjike të shkollave të indianëve në Kanada. Më 28 shkurt, filmi Soundtrack to a Coup d’État, që flet për xhazin, politikën e Luftës së Ftohtë dhe luftën për pavarësi në Kongo. Krejt në fund, më 1 mars, është shfaqur filmi No Other Land, që mbulon situatën tragjike në Lindjen e Mesme.

***

Po e vazhdoj atë fjalinë lart për 12 kënaqësitë e jetës që harrojmë se na e bëjnë jetën më të mirë: bisedat kuptimplota, ditët e qeta e të “mërzitshme”, ushqimi i shtëpisë, njerëzit më të dashur dhe ata që të duan ty.