24 Mars, 2025

Shkruan: Erletë Rrustemi

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditës së djeshme dhe domethënien e tyre për ne! Artikujt janë ditorë dhe bëhen një me ty kur ndajmë përditshmërinë e njëjtë në Kosovën tonë. Paper ndanë me ty!

Uroj ta kesh një javë sa më të mbarë, i dashur lexues! Dje, duke lexuar në Substack, pashë një shkrim që më kujtoi diçka të vjetër:

Dembelia vret ambicien;

Zemërimi vret mençurinë;

Frika vret ëndrrat;

Egoja ndalon rritjen;

Xhelozia vret paqen;

Dyshimi vret besimin.

Tani lexoje atë nga e djathta në të majtë. Gjithçka ka kuptim, apo jo?

***

Çka ndodhi dje në Kosovë?

Dje paradite (të dielën), PDK thirri konferencë për media. Kur doli pastaj në konferencë, paralajmëroi përdorimin e të gjitha mjeteve ligjore për të kundërshtuar shtrenjtimin e rrymës.

“Edhe me fjetë mbi qymyr, edhe me u shtrenjtu rryma” – pak dy botë të kundërta.

Shumë e mirë iniciativa, por çka bëhet edhe kur kundërshtohet shtrenjtimi i rrymës?

A ndalohet diçka tash, kur as qeveri nuk kemi, e të shtunën edhe qeverisë aktuale i skadon saktësisht mandati?

Zyra e Rregullatorit të Energjisë (ZRRE) ka marrë një vendim që i detyron bizneset të regjistrohen tek KEDS për të operuar në tregun e hapur të energjisë elektrike.

Çka do të thotë kjo?

Tregu i lirë i energjisë nënkupton një sistem ku bizneset dhe konsumatorët mund të zgjedhin vetë furnizuesin e tyre të energjisë elektrike, në vend që të jenë të detyruar të marrin energji nga një furnizues i vetëm, i rregulluar nga shteti. Në këtë model, çmimet përcaktohen nga konkurrenca mes furnizuesve në treg dhe jo nga autoritetet shtetërore.

Një vendim i tillë automatikisht ndikon në faturat e rrymës për këto biznese, që rrjedhimisht pastaj nënkupton shtrenjtim të produktit që e prodhojnë dhe shesin.

Çka thua ti, lexues? A mund të shkaktojë ky tranzicion çrregullime ekonomike dhe rritje të çmimeve të produkteve?

***

Kosova në Ligën B të Ligës së Kombeve

Kosova për herë të parë do të luajë në Ligën B të Ligës së Kombeve. Kualifikimin në Ligën B, që është niveli i dytë i Ligës së Kombeve, “Dardanët” e siguruan të dielën mbrëma në Murcia të Spanjës.

Në ndeshjen e dytë të playoffit, të përzgjedhurit e Franco Fodas fituan 3:1 ndaj Islandës. Ndeshjen e parë, të zhvilluar të enjten në “Fadil Vokrri”, Kosova e kishte fituar me rezultat 2:1. Dhe me rezultatin e përgjithshëm 5:2, Kosova avancon nga Liga C në Ligën B.

***

Libri i Alisa Maliqit: “Dodona”

Alisa Maliqi, që kryeqytetasit e njohin për anekdotat urbane dhe referencat kulturore e artistike, së fundi ka promovuar librin e saj. Libër ky, i cili i kushtohet një galerie që ka ekzistuar jo më gjatë se dy-tri vjet para luftës në Kosovë, por ku ekspozoheshin vepra arti kontemporan – vepra të rezistencës artistike ndaj okupimit, por edhe ndaj njëmendësisë.

Libri e ka emrin “Dodona”, ashtu siç e kishte edhe galeria, dhe mund ta gjeni në libraritë si Dukagjini.

***

Dhe nëse nuk e kuptuat fillimin:

Ambicia vret dembelinë

Mençuria vret zemërimin

Ëndrrat vrasin frikën

Rritja ndalon egon

Paqja vret xhelozinë

Besimi vret dyshimin