29 Mars, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditës së djeshme dhe domethënien e tyre për ne! Artikujt janë ditorë dhe bëhen një me ty kur ndajmë përditshmërinë e njëjtë në Kosovën tonë. Paper ndanë me ty!

Lexues, jo çdo stinë e jetës është për lulëzim dhe arritje. Disa stinë janë për mbjelljen e farave të së ardhmes, duke punuar në heshtje. Disa janë për pushim dhe reflektim, për t’u rikuperuar e për t’u forcuar. Disa janë për të mësuar dhe për të përthithur përvojë. Çdo fazë ka vlerën e saj, pranoje dhe ec përpara me besim.

Çka ndodhi dje në Kosovë?

A paguan rrymë njësoj një media me 100 punëtorë sa një kompani që prodhon mobilieri tash me tregun e lirë të energjisë? Që herë po kuptohet çka është e herë jo.

Pra, derisa partitë tona të vendosin se si do t’ia bëjnë me formimin e qeverisë së re, ne qytetarët jemi të ftuar të marrim pjesë në një protestë kundër shtrenjtimit të rrymës, sot një javë, pra me datë 5 prill.

Dje doli një letër e gjatë nga zyra e kryetares në të cilën argumenti më i fortë është që ZRRE-ja nuk do të duhej ta shkelte ligjin po a nuk e detyron ligji ZRRE-në që vendimin ta marrë në interes të qytetarëve??!

Kur argumentohet se Kosova e ka energjinë më të lirë në Evropë, pohimi është i pajustifikueshëm në praktikë. Në një vend të BE-së, ku paga mesatare është 5,000 euro dhe fatura e rrymës 100 euro, kjo përfaqëson vetëm 2% të të ardhurave mujore. Në Kosovë, ku paga mesatare është rreth 500 euro dhe fatura mund të jetë gjithashtu 100 euro, energjia përbën 20% të të ardhurave. Ky nuk është thjesht një dallim teknik. Rryma nuk është e lirë nëse qytetari mesatar duhet të shpenzojë një të pestën e të ardhurave vetëm për ta paguar atë.

***

Pra, rezultatet më në fund u certifikuan një muaj e gjysmë pasi që u mbajtën zgjedhjet. Ankesë pas ankese, krejt u refuzuan, por VV-ja e vazhdon betejën tash në Kushtetuese, ani që kjo nuk e ndalë zbatimin e vendimit për certifikimin e rezultateve.

Osmani u lajmërua dje për të thënë se së shpejti do të caktohet dita kur do të thirret seanca konstitutive e Kuvendit, edhe pse Kuvendi do të konsiderohet i konstituuar në çastin kur zgjidhet kryesia e Kuvendit, e gjë për të cilën, nuk ka afat të përcaktuar.

Pra, deputetët edhe do të mund ta japin betimin, porse jo domosdo do të konstituohet legjislatura e radhës, nëse ashtu vendoset të veprohet. Një legjislaturë që nuk e ratifikoi 60 milionshin e BE-së për kredi!!

****

Leipzigu për katër ditë është kryeqendra botërore e librit, motoja është kuptimplotë “Fjalët që lëvizin botët”, e një misioni si ky i është bashkuar edhe Kosova. Biblioteka Kombëtare e Kosovës, është “titullari” i përfaqësimit të shndërruar në traditë në ngjarjen që e ka zanafillën në vitin 1632. Të premten vendi ka debutuar me ngjarjen “Letërsia nga Kosova”!

***

Ka një ndryshim të madh mes të qenit i interesuar dhe të qenit i përkushtuar ndaj diçkaje. Kur je thjesht i interesuar, e bën atë që duhet vetëm kur të përshtatet dhe kur është e lehtë. Por kur je vërtet i përkushtuar, nuk ka justifikime, ti do të bësh gjithçka që duhet, pa marrë parasysh vështirësitë dhe pengesat që të dalin përpara.