Mirëmëngjesi, i dashur lexues!
Për mua, të bëhesh nuk do të thotë të arrish diku ose të përmbushësh një qëllim të caktuar. Unë e shoh atë si një lëvizje përpara, një hap drejt evolucionit, një mënyrë për të vazhduar të synosh një version më të mirë të vetes. Por ky udhëtim asnjëherë nuk përfundon.

Çfarë ndodhi dje në Kosovë?

“Kosovarët, edhe për vitin 2025, janë ndër më të lumturit në rajon, sipas Raportit Botëror të Lumturisë. Ashtu si vitin e kaluar, Kosova mbanë vendin e 29-të në listën e shteteve më të lumtura në botë, në një studim që përfshiu 147 shtete.

Renditja, e publikuar nga Qendra Kërkimore e Mirëqenies në Universitetin e Oksfordit, u përcaktua përmes anketave të vetëvlerësimit, ku individët e vlerësuan jetën e tyre në një shkallë nga 0 deri në 10 – ku 0 është jeta më e keqe e mundshme dhe 10 jeta më e mirë e mundshme”. Kështu tingëllon lajmi më i mirë i javës!

Tani imagjino sa njerëz u ndjenë, qoftë edhe për një minutë, sikur po jetonin jetën më të mirë të mundshme! Por, ja që ky ishte lajmi i javës që nuk kishte të bënte me tenderë, me sheshe, me zgjedhje apo me ZRRE-në.

Jemi “top” të lumtur që një proces i rregullt zgjedhor nuk do të arrijë të përmbyllet as brenda tre apo katër muajsh. Kjo, sepse kërkohet rivotimi, i cili eventualisht do të mund t’i sillte VV-së një apo dy deputetë më shumë. A ja vlenë kjo zvarritje e procesit deri në pafundësi, vetëm për këtë? Meqenëse asgjë nuk po ndodh, rrjedhimisht po shkojmë drejt këtij procesi.

Po sa të gatshëm janë deputetët, të cilët shpenzuan aq shumë për promovimin e tyre në fushatë dhe tashmë i kanë siguruar numrat për ulëse, të rikthehen sërish në këtë proces?

***

Tri ditë pas varrimit të babait të tij, ish-presidenti Hashim Thaçi, është lejuar ta vizitojë Kosovën.

“E sollën sot, në kohë të pa kohë, sa për sy e faqe. Nuk kanë asnjë ndjenjë në vetvete, e lëre më atë njerëzoren që u mungon plotësisht,” – kanë qenë komentet nga Organizata OVL-UÇK.

Thaçi u lejua mbrëmë të qëndrojë në hapësirat e EULEX-it, ku më vonë është vizituar edhe nga familjarët e tij të ngushtë.

***

Iftar në katedrale! PO, PO… boll interesante!

Kryetari i Prishtinës, Përparim Rama, ka njoftuar se dje ka shtruar iftar në Katedralen “Nënë Tereza” në Prishtinë.

Rama ka ndarë edhe disa fotografi nga ky iftar, duke shkruar: “Bashkë – gjithmonë.”

“Kryeqyteti shtron iftar në katedrale! Bashkë – Gjithmonë.” – ka shkruar ai.

***

Ani pse LDK tenton të mbajë një qëndrim unik, brenda saj ka zëra që e duan një koalicion me VV-në për një qeveri të re! Pse jo, në fund të fundit?

Kandidati i LDK-së për deputet, Anton Quni, nuk e ka përjashtuar mundësinë e bashkëpunimit të LDK-së me LVV-në për formimin e qeverisë së re.

Ai ka thënë se, personalisht, nuk ka vija të kuqe ndaj partisë së Albin Kurtit.

“Unë nuk kam, personalisht, vija të kuqe, pavarësisht gjithë atyre frustrimeve dhe konfuzioneve që janë shkaktuar. Këto janë çështje që diskutohen në organet më të larta të LDK-së,” – ka thënë Quni për RTV21.

***

Që nga momenti kur fillojmë të përpiqemi të bëhemi më të mirë se sa jemi, gjithçka rreth nesh bëhet gjithashtu më e mirë. Lumturia shpesh vjen fshehurazi nga një derë që nuk e dinit se e kishit hapur.