26 Shkurt, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditës së djeshme dhe domethënien e tyre për ne! Artikujt janë ditorë dhe bëhen një me ty kur ndajmë përditshmërinë e njëjtë në Kosovën tonë. Paper ndanë me ty!

I dashur lexues,

Ma bëj një të mirë, a mund të mos e trajtosh veten si mendim-sekondar. Vendose vetën në rendin e parë. Ha atë ushqimin e shijshëm, ec në diell, hidhu në det.

Çfarë ndodhi dje në Kosovë?

***

Me afrimin e marsit, nisin edhe shqetësimet për shtrenjtimin e mundshëm të rrymës në Kosovë.

Në këtë kohë, Zyra e Rregullatorit për Energji Elektrike (ZRRE) bën çdo vit shqyrtimin dhe caktimin e tarifave, të cilat shpallen çdo 1 prill dhe vlejnë deri më 31 mars të vitit pasues.

Sivjet, ZRRE-ja konfirmoi se kompanitë për shpërndarje dhe furnizim me rrymë kanë kërkuar që ajo të shtrenjtohet, por nuk specifikoi se sa.

Aktualisht, për konsumatorët që shpenzojnë deri në 800 kilovatë orë brenda një muaji, çmimi i rrymës gjatë ditës është 7.79 centë për kilovat, ndërsa për ata që shpenzojnë më shumë se 800 kilovatë, pjesa mbi këtë u llogaritet me çmim prej 14.45 centësh.

***

Për Bashkimin Evropian, asnjë institucion shëndetësor dhe arsimor, e as struktura të tjera të mbështetura nga Serbia që ofrojnë shërbime sociale bazë, nuk duhet të mbyllen. Në bllok shprehën gatishmëri që për këto çështje, lehtësuesi i ri i dialogut Kosovë-Serbi, Peter Sorensen, të organizojë takime me palët në Bruksel. Në Qeverinë e Kosovës nuk treguan nëse pranojnë të diskutojnë në këtë temë.

Ndërkombëtarët kanë qenë kundër edhe shumë veprimeve të Qeverisë, nëpërmjet të cilave janë mbyllur struktura serbe ilegale. Ata kanë kundërshtuar që nga vendimet për ndalimin e qarkullimit të automjeteve me targa ilegale, e deri te ai për ndalimin e dinarit të Serbisë.

***

Rezidenca 17 ju fton të festoni së bashku fuqinë e poezisë me lexime të poezive më datën 27.02.2025, në orën 18:00. Bashkohuni për një mbrëmje poezie, shprehjeje dhe frymëzimi. Në këtë mbrëmje poetike, zëra të çdo lloji mund të mblidhen për të ndarë fjalët, mendimet dhe emocionet e tyre. Sidomos nëse është hera juaj e parë që ndani poezitë tuaja me të tjerët, kjo është një mundësi për t’i ndarë ato me të tjerët, në një hapësirë të ngrohtë dhe mikpritëse. Sjellni poezitë, tregimet apo edhe tekstet spontane—skena është për ju!

***

Dhe krejt në fund, lexues, mos mendo që çdo herë duhet të reagosh. Kur ndihesh sikur situatat përreth teje janë të tepërta, merr frymë thellë dhe mos lejo që euforia e momentit të të kalojë.