Dje e lexova që raporti “Our Epidemic of Loneliness and Isolation” nga Surgeon General në SHBA dhe disa studime të Harvardit e Universitetit Brigham Young, të cilët kanë vënë në pah se vetmia është po aq e dëmshme për shëndetin sa pirja e 15 cigareve në ditë, i shkakton dëm zemrës, shkakton ankth dhe depresion. Sa mirë që ekzistojnë njerëz që dinë t’i mbajnë lidhjet me njerëzit, pavarësisht se çka përfshijnë ato.

Çka ndodhi dje në Kosovë?

Edhe po t’i kishte institucionet me mandat të plotë e stabile, Kosova vështirë që do të lëvizte në procesin e integrimeve në organizatat ndërkombëtare. E tash kur ka hyrë në një fazë të mërzitshme, joserioze, të paqartë të krizës institucionale, jo vetëm se nuk do të lëvizë, por rrezikon të mbetet në harresë. Në rrethana tejet të ndjeshme ndërkombëtare, një sjellje kaq joserioze e akterëve politik në Kosovë është e dëmshme dhe e rrezikshme.

Pra, Kosova ende nën sanksione të Evropës dhe plus tash me autosanksione, po kalon nëpër fazën më të keqe ekonomike që prej kur shpërtheu pandemia. Por kjo absolutisht askujt nuk i lë përshtypje.

Para disa ditësh, Agjencia e Statistikave të Kosovës bëri të ditur se shkalla mesatare e inflacionit për muajin qershor ishte 4,3%. Kur e krahason këtë shifër me nëntorin e vjetëm, kur inflacioni kishte qenë 0,7% dhe janarin e sivjetmë me 1,5%, kjo që është regjistruar muajin e shkuar do të duhej të ishte alarm për pushtetin.

Kjo do të thotë se aftësia blerëse e popullatës është duke u tkurrur përditë e më shumë.

Po të kishin pak sens për krejt çka po ndodh jashtë objekteve qeveritare, do ta kuptonin se mungesa e parasë në qarkullim ka arritur në një pikë papërshkrueshëm të ulët dhe se zinxhiri i obligimeve prej palës në palë shkon e zgjatet dita ditës, duke e shndërruar jetën tonë në jetë me këste.

***

Brenda vetëm tri ditësh janë shënuar tri incidente mes qytetarëve dhe zyrtarëve policorë, që përfshijnë sulme fizike, kanosje dhe pengim të arrestimeve. Mediat e juristët e lidhin këtë trend me rënien e besueshmërisë ndaj Policisë së Kosovës, pas rasteve të fundit me pasoja fatale gjatë arrestimeve.

Një gjë duhet me pasë të qartë pesë/dhjetë sado policë nuk e përfaqësojnë krejt Policinë e Kosovës. Nëse ka pasë raste që dikush ka tregu joprofesionalizëm nuk i bjen që të gjithë janë njëjtë.

***

Orkestra e fëmijëve të Prishtinës “Amadeus” ka shkëlqyer në njërën prej qendrave botërore të muzikës klasike. Në Vjenë, në Festivalin Botëror të Orkestrave është renditur e dyta duke marrë Medaljen e argjendtë. Nën udhëheqjen e dirigjentit Vehbi Shosholli, janë shpërblyer talenti e përkushtimi i instrumentistëve të rinj sikurse edhe kultura e vendit.

Një nga tri veprat e luajtura në programin garues, e ka shpërfaqur traditën shqiptare jo veç me anë të melodive por edhe me veshje. Orkestra në prestigjiozen “Golden Hall” të “Musikverein” në Vjenë ka interpretuar fillimisht “Palladio” nga Karl Jenkins, pastaj kohën e parë dhe të fundit të “Simfonisë së 45-të” të Haydnit. Më pas, anëtarët e Orkestrës kanë dalë nga skena, kur janë kthyer, veshja ka qenë krejt tjetër. Në skenë të muzikës klasike janë shfaqur me veshje tradicionale shqiptare.

***

Bukuria e jetës shpesh është vështirë e vërejtshme, kur kalon nëpër momente që i sheh si të errëta. Ama kur je keq kujtoje që nuk është aspak klishe thënja “shëndeti është kryesori”, si dhe mbaje mend atë grupin e fëmijëve që qëndroje me ta në lagje, përkrah atij gjyshit të lagjes, i cili me zorrë ujiste e për t’na e lënë në fytyrë një buzëqeshje e kthente ujin nga ne.