1 Mars, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditës së djeshme dhe domethënien e tyre për ne! Artikujt janë ditorë dhe bëhen një me ty kur ndajmë përditshmërinë e njëjtë në Kosovën tonë. Paper ndanë me ty!

 

Çdokush fillon diku, dhe çdo njeri që është i shkëlqyer në atë që bën dikur ka qenë një fillestar që nuk dinte shumë dhe është përballur me vështirësi. Është në rregull të mos i kesh ende të gjitha përgjigjet. Është në rregull të jesh i papërsosur, të gabosh dhe të mos i kesh të gjitha mjetet e duhura.

***

Çfarë ndodhi dje në Kosovë?

Kujt do t’ia merrte mendja që PDK-ja kishte kaq pak përkrahje nga jashtë, sa të ishte e fundit?

Komisioni Qendror i Zgjedhjeve të premten ka nisur publikimin e rezultateve të votave përmes postës.

Nga numërimi i 8.51% të votave, Lëvizja Vetëvendosje është e para me 1,293 vota apo 45.79%, e dyta është Lidhja Demokratike me 1,010 vota apo 35.76%, pasohet nga koalicioni AAK-Nisma me 335 vota apo 11.86% dhe Partia Demokratike, e cila ka 98 vota apo 3.47%.

***

Aktorët e Teatrit Kombëtar të Kosovës kanë pezulluar grevën pas më shumë se tre muajsh. Ky pezullim ka ardhur pasi kanë marrë “porosi” nga ministri në detyrë i Kulturës, Hajrulla Çeku, se kërkesat e tyre do të plotësohen brenda rreth tri javësh. Pezullimi po ashtu është bërë pasi disa aktorë kanë thënë se janë kërcënuar indirekt me ndaljen e pagave dhe largim nga vendi i punës.

Sipas njoftimit zyrtar të Shoqatës Sindikale të Aktorëve të TKK-së, të premten vonë aktorët kanë pezulluar aktivitetin sindikal.

Shtrohet pyetja: a do të ngrihen koeficientet që janë nga 8 e sipër për tre javë a? Nëse jo, çfarë ndodh tutje? A prehenë n’besë aktorët? Sepse me këtë qëllim aktorët kanë hyrë në grevë – për t’ua rritur pagat.

Koeficienti i tyre ishte përcaktuar të ishte 8, ndërsa kërkesat ishin për 11. Përkthyer në shuma: paga e aktorit të kategorisë së parë, me koeficient 8, është 880 euro bruto.

Deri te greva aktorët kanë ardhur pas paralajmërimit të parë në mes të shtatorit, kur provat kishin nisur me 10 minuta vonesë.

***

Gjykata Themelore në Prishtinë ka lëshuar urdhër që kryeministri i Kosovës, Albin Kurti, të paraqitet në Prokurorinë Speciale më 4 mars, në orën 10:00, për të dhënë dëshminë e tij rreth skandalit me rezervat shtetërore.

***

Ndërtimi i aftësive kërkon kohë, i dashur lexues. Mësimi i gjërave të reja dhe zhvillimi i forcave të tua kërkon kohë. Të përballesh me vështirësi në diçka që nuk e ke bërë kurrë më parë është njerëzore dhe normale dhe është në rregull.