5 Mars, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditës së djeshme dhe domethënien e tyre për ne! Artikujt janë ditorë dhe bëhen një me ty kur ndajmë përditshmërinë e njëjtë në Kosovën tonë. Paper ndanë me ty!

Një ëndërr kisha dikur, ëndrrën sot e jetoj, shtetin tim e jetësoj, në vete besoj… Përsëritet prap kjo fjali dhe pastaj vjen kjo… Shqiponjeeeee që shtrihem në kaltërsi fluturoj e lirë dhe nuk kam frikë përpara çfarë më pret – thotë Eliza Hoxha në këngën e saj “Himni im”.

A fluturon e lirë sot Kosova, apo kjo ishte vetëm liria që ndjenim kur u shpallëm shtet?

***

Sot lexues po e nisim me nje kujtim te datave.

Bash sot bëhen 27 vite nga rënia heroike e familjes Jashari, duke shënuar veprën sublime të kësaj familjeje. 5, 6 dhe 7 marsi nënkuptojnë Epopenë e UÇK-së.

Emri Epope i është vënë për të nënkuptuar vargun e ngjarjeve heroike e me rëndësi historike në jetën e një populli.

Përndryshe, është lloji i letërsisë epike, poemë e madhe ku përshkruhen tregimet dhe veprat legjendare të jetës së një kombi.

Kështu, në natën e 4 dhe 5 marsit të vitit 1998, Prekazi rrethohet nga forca të shumta ushtarake dhe policore. Kjo lë të kuptohet se atje do të ketë rrethim të hekurt.

Pikërisht sot, më 5 mars, bëhen 27 vjet nga rënia e komandantit legjendar Adem Jashari, familjes së tij dhe Jasharëve të tjerë.

55 të rënë. Sulmit i mbijetoi vetëm Bashkimi, djali i Rifatit, i cili ia doli që mes datës 5-6 mars të largohet nga rrethina dhe arriti t’i shpëtojë sulmit, si dhe Besarta, vajza e Hamzës, e cila pa dhe përjetoi tmerrin derisa vriteshin anëtarët e familjes së saj.

***

Dita e djeshme shkoi me përgatitje për ceremonitë që pritet të ndodhin sot dhe këto dy ditë tjera prej vizitave deri tek flakadanët në shtatë rajonet e Kosovës.

Refuzimi i kryeministrit Albin Kurti që të mos shkojë në gjykatë për të dëshmuar ka filluar të shndërrohet në legjendë.

Ka mundësi që historia nuk e harron dhe shkruhet për këtë më shumë sesa për të bëmat e tjera të tij si kryeministër (po bëj shaka).

Duket sikur e gjithë kjo është mes një luksi dhe lufte politike. Luksi, pasi mbështetet në pozitën që gëzon; luftë, për shkak të mosbesimit tashmë të shprehur që kryeministri ka ndaj sistemit të drejtësisë në Kosovë.

Mirëpo, lexues, a nuk është kjo promovim i pabarazisë ndaj qytetarëve të tjerë?!

Një kryeministër i përgjegjshëm shkon dhe dëshmon.

***

Ka përfunduar numërimi i votave të ardhura me postë.

Sipas të dhënave të përditësuara nga Komisioni Qendror i Zgjedhjeve (KQZ), LVV ka siguruar 31.963 vota, që përbëjnë 51.57% të totalit.

Lidhja Demokratike e Kosovës (LDK) ka dalë e dyta me 18.933 vota ose 30.55%.

Në vendin e tretë është renditur Partia Demokratike e Kosovës (PDK) me 5.878 vota, që përfaqësojnë 9.48% të numrit total.

Ndërkohë, koalicioni AAK-Nisma ka arritur të mbledhë 2.000 vota ose 3.23% të votave me postë.

 

***

Deputetët e opozitës në Serbi lëshuan të martën (dje) dy herë bomba tymi dhe aktivizuan mjete piroteknike në Kuvend.

Krejt kjo pasi deputetët e koalicionit qeverisës miratuan rendin e ditës, të cilin opozita e kundërshtoi.

Grushte dhe tym me deputetët e opozitës që shpalosnin edhe pankarta se “po e rrëzojnë regjimin”.

Kryetarja e Kuvendit, Ana Bërnabiq, nuk harroi që ta përmendte Kurtin, duke printuar shembuj të lajmeve që u publikuan dje në Kosovë nga “Koha.net” dhe “Reporteri”, e cila “shantazhonte” që një gjë e tillë të ndalej, pasi kjo sipas saj, vetëm sa ja bën qejfin Kurtit dhe Kosovës.

***

Brengë, që shpirtin ma shtrëngoi, sa zemra i lëndoi, sa njerëz i vetmoi, ishte ëndrra që sot jetoj, një emocion që s’dua kurrë të më lëshojë. Prandaj, larg shikimin ti drejto, prapa mos shiko. Në të ardhmen beso, të kaluarën mos e harro, gjithmonë kujto kush ishe dhe nga do të shkosh.