5 Gusht, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditëve të shkuara dhe domethënien e tyre për ne! Artikulli është përmbledhje javore me lajme që kryesuan javë  dhe bëhen një me ty kur ndajmë lajmet e njëjta në Kosovën tonë. Paper ndanë me ty!

Mirëmengjesi i dashur lexues, nëse e merr si të mirëqenë gjithçka çka sot ka bota, atëherë e ke lënë anash edhe idenë që dikush, dikur zbuloi diçka që sot na hynë në punë. Më 5 gusht 1914 është vendosur semafori i parë elektrik në botë në cep të Euclid Avenue dhe East 105th Street në Cleveland, Ohio. Po besoj e keni parasysh sa shumë e pakëson “kaosin” ky mjet, i cili veç merret sikur e ka vendin e vetë.

Nejse… kthehemi shkurtimisht se çka ndodhi dje në Kosovë?

Vuçiq ofendoi Perëndimin dhe mohoi zgjedhjet në veri.

Presidenti serb Vuçiq i ka quajtur “bastardë” liderët perëndimorë, vetëm pak orë pasi ishte telefonuar nga presidenti francez, Emmanuel Macron. Ai ka kritikuar edhe serbët e Kosovës që punojnë në komunat veriore dhe ka thënë gabimisht se zgjedhjet atje nuk janë mbajtur.

***

Në anën tjetër Milos Antovic pranoi se ka sulmuar ushtarët e KFOR-it.

Milos Antovic ka pranuar se ka marrë pjesë në sulmet ndaj ushtarëve të KFOR-it në veri të Kosovës në vitin 2023. Ai ka thënë se është fajtor për katër vepra penale, përfshirë sulmin ndaj policisë dhe pjesëmarrjen në grupe të dhunshme.

Pse kaq papritur po pranohet faji tash?

***

Të premten, më 8 gusht, merr fund masa e përkohshme e vënë nga Gjykata Kushtetuese, me të cilën u është ndaluar deputetëve çfarëdo vendimi apo veprimi për konstituimin e Kuvendit.

E vetmja gjë që dihet është se gjykata nuk theksoi në aktgjykimin e parë të sajin, të nxjerrë në fund të qershorit, pasojat që prodhohen në rastin kur brenda afatit 30-ditor nuk konstituohet Kuvendi.

Kam përshtypjen që kësaj radhe Gjykata Kushtetuese është munduar që të jetë pak më e shpejtë dhe më e saktë.

Deputetët dështuan për 54 herë me radhë që ta përmbyllin seancën konstituive të Kuvendit. Punë nuk kreu as obligimi i vënë nga Kushtetuesja që konstituimi i legjislaturës së nëntë të kryhet brenda 30 ditësh e as organizimi i dy vazhdimeve të seancës në ditën e fundit të afatit.

***

Jazzi në Mitrovicë dëgjohet qe një shekull. Para gati 100 vitesh, në qytetin kosovar patën zbarkuar një koloni anglezësh (bile edhe do amerikanë) si inxhinierë dhe minatorë në minierat e Stantërgut, me shpija angleze, fusha tenisi, pishina por edhe pllaka gramofoni dhe festa me jazz në Hotelin e vjetër Jadran.

100 vjet ma vonë Mitrovica osht shndërru në epiqendër të xhazit, falë festivalit të shkëlqyeshëm, Mitrovica International Jazz Days (MIJD). Sivjet festivali premton me pru pak nga 8 deri 10 gusht, me performanca nga Emma Smith, Gianluca Petrella, Haezz, Hakan Basar Trio, Eyrie, por edhe bende vendore, punëtori muzikore, programe për fëmijë dhe plot befasi të tjera.

***

Ndoshta s’mund ta ndalim kaosin me semaforët, por mund të ndalemi një çast për të menduar se çfarë ndodhi dje dhe çfarë do të thotë për nesër. Jazz-i në Mitrovicë na kujton që edhe në një vend të lodhur nga lajmet, tingulli i mirë ka gjithmonë vend. Shihemi nesër me shpresën se do të flasim më shumë për muzikë dhe më pak për “bastardë”!