Mirëmëngjesi lexues, sot një zë më tha: Dashuria është distanca mes teje dhe asaj që ti dëshiron ta kesh. Çka ti do, është fati yt. Ka mundësi që sot ke nevojë ta dëgjosh këtë. Lexoje përsëri për ta marrë mesazhin.

Dje u shfaqën disa fakte shqetësuese që ende po rrjedhin dhe do të vazhdojnë të rrjedhin nga procesi zgjedhor.

Ndër to, fitorja e Listës Serbe në Mitrovicën e Veriut, Zubin Potok, Zveçan dhe Leposaviq. E si ka mundësi kështu? A keni ndonjë shpjegim apo hiç?

Lista Serbe ka fituar në mënyrë absolute në secilën komunë me shumicë serbe në pjesën tjetër të Kosovës.

Ndërkohë, ministri në detyrë për Komunitete dhe Kthim, Nenad Rashiq, ka deklaruar se Lista Serbe po tenton të manipulojë procesin zgjedhor duke ofruar shuma të mëdha parash për të anuluar votat e partisë së tij.

Për herë të parë, Lista Serbe është në rrugë për të humbur një ulëse nga 10 të garantuara për serbët në Kuvendin e Kosovës. Kjo, pasi një ulëse pritet ta marrë partia e Rashiqit.

***

Tjetra është se fillimisht numërimi i votave për kandidatët për deputetë, i cili duhej të niste të hënën, nuk ka filluar deri dje. Më pas u ndërpre dhe u rinis sërish. Ndërkohë, mbrëmë rreth orës 22:00, ra sistemi ku po futeshin të dhënat nga numërimi i votave të kandidatëve për deputetë në Qendrën Komunale të Numërimit në sallën “1 Tetori” në Prishtinë.

Po ashtu, në një nga tavolinat e numërimit në të njëjtën qendër, u anulua numërimi i deritanishëm, duke u ripërsëritur për shkaqe teknike.

Sipas komisionerëve që po numërojnë votat, kjo mund të ketë ndodhur pasi një fletëvotim është numëruar dy herë ose gabimisht është klikuar dy herë i njëjti kandidat për deputet, për çka sistemi ka “lajmëruar” parregullsinë.

Pra, nëse në rezultate shohim ndonjë deputet shumë lart, ashtu si atë ditën e votimeve kur VV-ja doli me 55%, mos u besoni menjëherë, sepse ka mundësi që i kanë numëruar nga dy herë!

Teksa Kurti sheh fitoren si të padiskutueshme, a do ta shohë si të tillë edhe formimin e qeverisë?

***

Prishtina e ka mjaft të zhvilluar skenën e grafitit dhe muraleve. Shumë prej tyre zbukurojnë qoshet e ndërtesave dhe sjellin papritur ndonjë thyerje kreative mes pluhurit, rrëmujës dhe kaosit vizual.

Hapësira kreative Sekhmet ju fton të ndani me ta muralin e tyre më të ri në Project Space Sekhmet. I krijuar nga Hana Haziri, ky mural e sjell në jetë Sekhmet-in si “përfaqësim i fuqisë dhe feminitetit të paturpshëm.” Zbulimi i muralit bëhet më 12 shkurt 2025, në orën 19:00.

***

Teksa po shkoja mbrëmë në shtëpi, vazhdoja të mendoja – e di që ka gjëra që nuk u kam mbijetuar, e di që ka njerëz në botë që kanë kaluar përmes ferrit për të arritur aty ku janë… por prapë doja që spiranca të ngulitej thellë, të mbante diçka, diçka që nuk e lëshon kurrë.