Të gjithë kanë dëshira, është pjesë e natyrës njerëzore të dëshirosh më shumë, të synosh diçka tjetër, të ëndërrosh. Por nëse lidhemi verbërisht me to, rrezikojmë të humbasim kthjelltësinë e mendjes dhe të harrojmë se jo çdo dëshirë është e domosdoshme, as e dobishme. Andaj është e rëndësishme t’i kuptojmë dëshirat tona, por të mos lejojmë që ato të na kontrollojnë.

Çka ka ndodhur dje në Kosovë?

Kosova është vendi i vetëm ndër gjashtë shtetet e Ballkanit Perëndimor (WB6) që ka shënuar rritje të lindjeve në vitin 2025, krahasuar me të njëjtën periudhë të vitit të kaluar. Lindjet në Kosovë janë rritur për +1.2%, ndërkohë që të gjitha vendet tjera regjistrojnë rënie të theksuar:

Shqipëria: -7.8%

Serbia: -7.3%

Bosnja dhe Hercegovina: -5.3%

Mali i Zi: -4.6%

Maqedonia e Veriut: -3.9%.

Duke pasur një popullsi më të re në raport me fqinjët, Kosova ka potencialin të ruaj një strukturë demografike më dinamike. Megjithatë, ky potencial rrezikon të mbetet i pashfrytëzuar nëse nuk adresohen pengesat që i detyrojnë të rinjtë të largohen nga vendi.

Sipas të dhënave nga Agjencia e Statistikave të Kosovës (ASK), në vitin 2024 janë regjistruar rreth 20 mijë lindje, por në të njëjtën kohë, mijëra të rinj po largohen çdo vit nga vendi. Në periudhën janar-qershor 2024, mbi 25 mijë qytetarë kanë kërkuar dokumente për emigrim të përhershëm, sipas të dhënave të Ministrisë së Brendshme.

Në këtë kontekst, rritja e lindjeve është më shumë një dritë e vogël në një peizazh demografik të errësuar nga emigrimi dhe mungesa e stabilitetit ekonomik.

Kosova ka thyer trendin negativ të rajonit, por sfidat reale mbeten të mëdha.

***

Janë publikuar pamje të tjera të momentit kur Agon Zejnullahu del nga vetura me duar pas kokës, ndërsa shihen policët teksa ndodhen sipër tij.

27-vjeçari vdiq të hënën në Lipjan, pasi është ndaluar nga zyrtarët policorë.

Veçoj që Gjykata Themelore në Prishtinë, dega në Lipjan ka pranuar kërkesë për caktim të masës së paraburgimit për policët e dyshuar.

Këtë e ka konfirmuar zëdhënësja e Gjykatës Themelore në Prishtinë, Mirlinda Gashi, e cila njoftoi se sot do të mbahet seanca dëgjimore për pesë policët.

***

Kosova është nikoqire e Kampionatit Evropian të Esporteve për vitin 2025, i cili nis sot në Prishtinë, me pjesëmarrjen e lojtarëve nga 24 shtete evropiane. Organizimi i këtij eventi është cilësuar si një hap i rëndësishëm për afirmimin e Kosovës në skenën ndërkombëtare të esporteve, nën moton “Kosova, ylli i ri në esport!”

Megjithatë, në një zhvillim të papritur, autoritetet serbe kanë ndaluar në momentin e fundit pjesëmarrjen e lojtarëve serb, vetëm për shkak se turneu po mbahet në Kosovë. Ky vendim politik u kritikua gjerësisht si një akt penalizues ndaj sportistëve dhe një shembull tjetër i tensioneve të vazhdueshme në marrëdhëniet Kosovë-Serbi.

Në konferencën për media të mbajtur në Prishtinë, organizatorët e kampionatit theksuan rëndësinë e turneut për të promovuar bashkëpunimin dhe paqen përmes esporteve digjitale, duke i dhënë rëndësi pjesëmarrjes së të rinjve nga e gjithë Evropa.

***

Xhelozia është një helm i heshtur që nuk dëmton askënd tjetër përveç vetes. Ajo të bën të shikosh përtej gardhit, duke injoruar bukurinë që ndodhet në oborrin tënd. Në vend që të ushqej mirënjohjen për atë që ke, ajo të vë në garë me të tjerët, duke të mbushur me pakënaqësi, zili dhe zbrazëti.