Uroj që dita e sotme të kalojë mbarë e qetë, pa mashtrime, pa vonesa të pakuptimta, pa ndërprerje të energjisë, me kamera funksionale, me numërim të shpejtë dhe transparent të votave, pa manipulime e pa lojëra të brendshme mes kandidatëve.

Në të paktën prej ditëve kur vëzhguesit e komisionerët janë më të hershëm se gjeli.

Duhet ta kishim arritur tashmë një nivel pjekurie që të na bënte krenarë për një proces zgjedhor të rregullt, ashtu siç i ka hije një shteti të vogël, por demokratik.

Ani pse e tërë dita e diel do të na kalojë duke pritur kandidatët për kryeministër nga të gjitha partitë teksa votojnë dhe prononcohen, në fund do të marrim një rezultat për të cilin disa mezi e kanë pritur.

Dje lexova një status që thoshte: “Nuk ia paskemi ditur kimetin heshtjes zgjedhore”, domethënë na lodhën këtë herë çdo ditë prej kur ka filluar fushata. Aq më tepër kur dje tri partitë opozitare mbajtën edhe tubimet përmbyllëse.

Në emisionin e mbrëmjes në T7, sipas një eksperti, i cili bën kalkulimin për metra katrorë me njerëz, profesori Tomor Çelaj tha se VV kishte 6 mijë njerëz, PDK 14 mijë dhe LDK 24 mijë. Ec e dije tash… mbetet të shihet rezultati.

Vota është tepër e çmueshme për të mos u shfrytëzuar. Unë besoj fuqishëm që të gjithë ne duhet ta ushtrojmë të drejtën për të zgjedhur, edhe nëse kjo do të thotë se nuk ke kujt t’ia japësh votën. Së paku nuk duhet lejuar asnjë hapësirë për manipulimin e votës që i takon secilit individualisht. Dalja në votim është marrje e përgjegjësisë për të ardhmen e secilit.

Në fushatë nuk u regjistruan incidente ndërpartiake të asnjë lloji, përveç gjuhës ofenduese dhe fyese, që nuk mund të shihet si incident, sepse fatkeqësisht është pjesë e diskursit politik në Kosovë.