1 Prill, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditës së djeshme dhe domethënien e tyre për ne! Artikujt janë ditorë dhe bëhen një me ty kur ndajmë përditshmërinë e njëjtë në Kosovën tonë. Paper ndanë me ty!

Mirëmëngjesi, i dashur lexues! Kur mendon se ke humbur, a nuk thua se ndoshta është mundësia për një drejtim të ri? Kur mendon se gjithçka u thye, a nuk thua se ndoshta gjërat thjesht po bien në vendin e tyre? Kur mendon se u refuzove për diçka, a nuk e mendon si mbrojtje nga diçka që nuk do të ishte e mirë për ty, pavarësisht dëshirës Mendoje…

Çka ndodhi dje n’Kosovë?

Si të janë ujërat e qeta lexues, gjithmonë dihet që diçka shpejt “kërset”! Mendojshi që festë, e ruhet paqja a? Jo, jo kur veç të bëhen publike, i bjen që veç se kanë qenë probleme ekzistuese!

Dje njërja prej mediave online, i ka bërë publike, bisedat prej një grupi në “Viber” të kryesisë së LDK-së ku protagonistët kanë qenë emrat e njohur si ish-kryeministri Abdullah Hoti, Arben Gashi, Kujtim Shala aka Kujta të cilët diskutojnë për votat me postë të diasporës dhe “manipulimin e këtyre votave”, biseda këto të cilat janë zhvillu sipas “Reporterit”, të gjitha para asaj mbledhjes së famshme që ka zgjatë pesë orë me 10 mars. Po qysh mos me zgjatë kur paska pasë çka me fol???

Tash mes të tjerash në bisedë vihen re edhe karakteristikat e heronjëve të cilat përmes fjalëve i shpalos Arben Gashi.

Ish-shefi i grupit parlamentar të LDK-së po këmbëngulte se ka pasur vjedhje të votave dhe insistonte që skemës, që sipas tij u orkestrua nga disa bashkëpartiakë.

“Kujtim, qitja emrin, nuk është manipulim, është skemë e organizuar kriminale. Pa e identifiku saktë problemin nuk mundemi me e shpëtu partinë”, shkruan fjalë për fjalë Gashi.

Qysh bre “skemë kriminale”, a pak këta terma i kanë përdorë kundërshtarët tuaj a? A nuk duhet bile të jetë një shprehje ma ndryshe i dashur lexues nëse veç ka të vërteta në këtë mes?

Pak kam fillu me mendu që është “skemë e 1 prillit”? Meqenëse gjysma e bisedave u lajmëru që kanë me dalë edhe sot.

Normalisht që kemi pasë edhe reagim të kryetarit Abdixhiku pas ndodhive të fundit.

Lumir Abdixhiku ka thënë se “sulmet e sinkronizuara ndaj LDK-së, të nisura nga përfundimi i zgjedhjeve, nuk janë as të rastësishme e as të paqëllimshme”.

***

Zyra e Rregullatorit të Energjisë nuk ka sqaruar se si do të ndikojë liberalizimi i tregut të energjisë me daljen në treg të hapur të konsumatorëve me mbi 10 milionë euro qarkullim në vit ose me mbi 50 punëtorë. Nga INDEP kanë kërkuar sqarime mbi këtë çështje. E njohës të fushës së energjisë e quajnë selektive qasjen e ZRRE-së.
Zyra e Rregullatorit të Energjisë nuk ka sqaruar se si do të ndikojë në tarifat e energjisë dalja në treg të hapur e konsumatorëve me mbi 10 milionë euro qarkullim ose me mbi 50 punëtorë.

***

Albulena Haxhiu e Vetëvendosjes ka thënë se tash pas certifikimit të rezultateve të zgjedhjeve, do të ketë takime me grupe parlamentare dhe deputet për të konstituar institucionet. Ajo ka thënë se këtë do ta bëjnë me partnerë që i kanë pasur, por edhe me ata që do t’i kenë. Por jo opozitën.

Qysh?

“Besoj se tashmë pas certifikimit të rezultateve vazhdon puna për themelimin e institucioneve të Republikës së Kosovës, gjegjësisht edhe për Qeverinë Kurti 3. Ne do të kemi përpjekje të vazhdueshme për të takuar grupe parlamentare, përjashto këtu opozitën, pra me partnerët tanë të koalicionit te cilët edhe jemi, por edhe natyrisht me të tjerët të cilët do t’i kemi”, tha Haxhiu.

Le vetëm këtë, po tash edhe ndodhitë e LDK-së kanë dhënë shkas që natyrisht Haxhiu për të reaguar:

PZAP-ja dhe Supremja “i mbyllën sytë përballë këtij krimi”, derisa ka kërkuar nga Prokuroria që t’i zgjerojë hetimet ndaj anëtarëve të Kryesisë së LDK-së.

***

A është fundi apo fillimi i diçkaje më të mirë? A është dështim apo një mësim i fshehur? A ishte një gabim apo rritja jote po pritej të ndodhte? A janë dyert e mbyllura apo rrugët e reja që po hapen për ty? A është një tjetër “thyerje e zemrës” apo një rikujtim se duhet ta duash veten së pari?

Dhe në fund, i dashur lexues: çdo gjë që ndodh… ndodh për të mirën tonë!