Njerëzit, vendet, përvojat do të të gjejnë në kohën e duhur, në mënyrën e duhur, në vendin e duhur. Dhe kjo nuk do të thotë se do të vijnë kur ti mendon se është koha e duhur, por do të vijnë në momentin e tyre perfekt. Miku im i dashur, gjithçka që është e destinuar për ty tashmë është në rrugën për të të gjetur. Ëndrrat dhe shpresat e tua nuk po të largohen.

Një fjalë e urtë e popullit thotë: “Kush lyp shumë, e humb dhe atë që ka!” ose edhe ajo “Shtrij këmbët sa të mbërrijë jorgani.” Fushatat mbresëlënëse të opozitës, me plot njerëz dhe super organizim, u zgjuan sot në një realitet tjetër, edhe pse ende gjithçka është në pritje.

Çka ndodhi dje?

***

Për herë të parë pas 20 vitesh, kemi rënë në gjumë pa e ditur rezultatin preliminar nga KQZ. Mbrëmë, pas mbylljes së vendvotimeve dhe në pritje të rezultateve, e vetmja gjë me të cilën u informuam ishin exit-pollet e transmetuara në Dukagjin, KTV, T7 dhe Klan Kosova.

Pra, një terr informativ. Më e keqja është se as partitë nuk treguan asgjë, ani pse komisionerët e secilës e dinin pak a shumë rezultatin pas orës 21:00.

A ndodhi një hakim apo se si u “çorodit” faqja e internetit e KQZ-së ende mbetet e panjohur, përderisa u tha se prokuroria do të nisë hetimet.

Kryetari i KQZ-së, Kreshnik Radoniqi, doli në konferencë për media rreth orës 22:00 dhe tha:

“Sigurojmë qytetarët e Kosovës se mostransmetimi i të dhënave apo rezultateve preliminare për subjektet politike përmes platformës elektronike nuk ka asnjë ndikim në rezultatet, të cilat tashmë janë pjesë e këtyre formularëve. Pasi t’i grumbullojmë në mënyrë manuale, do t’i publikojmë.”

Pra, e lanë numërimin me dorë, sepse e panë që ai elektronik nuk po bënte punë.

Ashtu siç u paraqitën pak a shumë në exit-pollet, ashtu doli edhe performanca e partive në zgjedhjet e para parlamentare të rregullta që nga viti 2008.

Kryeministri aktual dhe kandidati për kryeministër nga Lëvizja Vetëvendosje doli dhe e shpalli fitoren bindëse të partisë së tij, por pa dhënë numra konkretë të fitores.

Shumë korrekt dhe i saktë u tregua Lumir Abdixhiku i LDK-së, kur kërkoi falje se, në mungesë të daljes së KQZ-së, detyrohej ai të tregonte rezultatin.

“Kërkojmë mirëkuptim edhe nga partitë e tjera, sepse më duhet të flas edhe për numrat e saktë të partive të tjera. Sipas numërimeve të votave nga komisionerët tanë në procesin zgjedhor, kanë marrë pjesë 871 mijë e 478 votues. LDK ka marrë 18.14% ose 158 mijë e 54 vota, LVV 39.88% ose 347 mijë e 543 vota, PDK 21.84% ose 190 mijë e 363 vota, Kosova Fituese 7.62% ose 66 mijë e 356 vota dhe Koalicioni për Familjen 1.5% ose 13 mijë e 98 vota. Minoritetet dhe të tjerët janë 11.02% ose rreth 96 mijë e 55 vota,” tha Abdixhiku.

Vlen të theksohet se, pas numërimit të popullsisë, dalja e votuesve konsiderohet rreth 4% më e vogël se ajo e vitit 2021 me përqindje, por me numër është përafërsisht 900 mijë vota, më e madhja ndonjëherë.

Tash, i dashur lexues, Kushtetuta ia ofron mundësinë fituesit të parë për krijimin e qeverisë. Nëse nuk mundet i pari, atëherë i jepet partisë së dytë fituese. Me këto numra deri tani, a e krijon VV qeverinë me votat e pakicës apo u rritet numri i deputetëve tre partive kryesore pas numërimit të votave të diasporës dhe votave me kusht, mbetet të shihet.

Përsërite këtë çdo ditë:
Një fillim i ri. Një mundësi për të rifilluar zakonet që kam lënë pas dore. Do ta laj fytyrën më shpesh. Do ta lëviz trupin tim me erën. Do të ulem pa shpërqëndrime. Do të bëj më të mirën për ta bërë këtë muaj më të mirë se i kaluari. Dhe nëse nuk ia dal këtë herë, gjithmonë kam muajin tjetër.