20 Korrik, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditëve të shkuara dhe domethënien e tyre për ne! Artikulli është përmbledhje javore me lajme që kryesuan javë  dhe bëhen një me ty kur ndajmë lajmet e njëjta në Kosovën tonë. Paper ndanë me ty!

Nëse dikush mendoi se korriku do të ishte muaj pushimi, ne do të diskutonim për turizmin në Kosovë edhe sa të mira janë shërbimet tek ne, e keni gabim. Gjykatat folën, politikanët u zemëruan, Facebook-u u kthye në sallë gjyqi dhe qytetarët u lanë të bëjnë rolin e përkthyesit midis të drejtës kushtetuese dhe realitetit alternativ.

Supremja foli dhe pastaj folën të gjithë të tjerët! Je apo s’je jurist me profesion, një interpretim duhet ta kesh.

Gjykata Supreme nxori një vendim. Askush nuk ishte i sigurt çfarë tha përveç ministrit të Financave, Hekuran Murati, i cili e dinte saktësisht çfarë nuk kishte thënë. Sipas tij, Supremja kishte rënë në grackën e terminologjisë opozitare (sëmundje ngjitëse me sa duket) dhe kishte interpretuar në mënyrë të gabuar një aktgjykim të Gjykatës Kushtetuese.

Këtë javë Gjykata Supreme ka konstatuar se deputetët nuk mund të ushtrojnë edhe funksione në Qeveri.

Murati, gjithmonë i saktë në referenca dhe i zemëruar në ton, sqaroi se deputetët që nuk e kanë përfunduar seancën konstituive janë si versioni beta i një aplikacioni që teknikisht ekziston, por ende nuk funksionon. E nëse nuk funksionon ende, s’ka konflikt funksional. Shkencë e thjeshtë.

Parimisht ka dallim thelbësor midis fillimit të ushtrimit të mandatit dhe ushtrimit të plotë të funksionit? Momentalisht, deputetët janë duke e ushtruar vetëm një pjesë të funksioneve të tyre, sepse Kuvendi nuk është konstituuar ende, por ata janë deputetë, sepse ndryshe as nuk do të kishin mundur të hynin në sallën e Kuvendit, a po?

Por krejt dramën e ndezi anulimi i Udhëzim Administrativ për arkat fiskale digjitale, nga Supremja me argumentin se ishte lëshuar nga një njeri me dy karrige, pra nga Murati, ministër dhe deputet dhe kjo nuk bën.

Por janë 12 akte nënligjore që janë nxjerrë nga Qeveria e ministritë përkatëse që nga certifikimi i rezultateve të zgjedhjeve të 9 shkurtit. Prej tyre, tri figurojnë se janë nënshkruar para zyrtarizimit të rezultateve zgjedhore.

Nga nëntë të tjerat, gjashtë janë nënshkruar prej deputetëve që mbajnë edhe postet ekzekutive, si kryeministri Albin Kurti e ministrat Xhelal Sveçla, Hekuran Murati, Arbërie Nagavci dhe Hajrullah Çeku, ndërkaq një është nënshkruar nga ministri në detyrë, Liburn Aliu, që nuk ka garuar për deputet.

***

Gjykata “ka gjykuar” këtë javë

Në lajme të tjera, pas shtatë vjetësh pritjeje, Gjykata Themelore vendosi të dënojë dhjetë persona për shpërdorim detyre në rastin e veteranëve të rrejshëm. Ish-kryeministra, ministra, komandantë – një listë që do ta kishte zili edhe Akademia e Arteve. Të gjithë u dënuan me nga një vit burg, për një dëm prej 88 milionë eurosh.

***

Ish-prokurori Elez Blakaj, u lajmërua për të rikujtuar ligjin që ai vetë e kishte ndjekur dikur. Me një status të gjatë në Facebook që ngjanë më shumë me një aktakuzë publike, ai bëri atë që sistemi refuzon ta bëjë: e sqaroi dallimin mes “veteranit të luftës” dhe “veteranit të rastit”. Dhe po, i akuzoi disa për manipulim të qëllimshëm të opinionit publik, një sport kombëtar tashmë.

Duke e theksuar ligjin për kategorizimin e veteranëve të UÇK-së tha se PAGESË/PENSION, sipas këtij ligji, marrin vetëm Invalidi i luftës së UÇK-së dhe Veterani luftëtar i UÇK-së dhe pikërisht KJO pagesë/pension ka qenë pika e kthesës ku procesi ka devijuar seriozisht!

Në status e tij ai theksoi edhe përkufizimet sipas ligjit të secilit kontributor në luftë se për çka qëndrojnë.

***

Vetingu, premtimi që vazhdon të vrapojë drejt nesh, por s’arrinë kurrë!

Në fund, të gjithë bien dakord për një gjë: mungesa e besimit në drejtësi është e thellë dhe për ta rikthyer atë, na duhet veting. Prej vitesh premtuar, shpesh përmendur, por asnjëherë zbatuar. Si një autobus fantazmë që del në orarin e stacionit, por që askush nuk e ka parë ndonjëherë të vijë.

***

Java s’ka si të mos kishte art në kryeqytet. Punojmë ton javën, të premtën e të shtunën, duhet me pasë diçka që relaksohemi.

Armend Rexhepagiqi e mbylli koncertin e tij, të organizuar nga Rave prapa Pallatit të Rinisë, ku të gjitha biletat kanë qenë “sold out” ndërsa publiku ka vallëzu e këndu në këmbë gjithë natën.

Go Armend… muzika jote kë se bon me këndu se?!

***

Aktgjykimi i Kushtetueses këtë javë është interpretuar si të ishte horoskop – secili lexon çfarë i pëlqen. Ministrat bëjnë rolin e juristëve, gjykatat flasin me kode dhe qytetari sërish mbetet me shpresën se e drejta do të vijë. Edhe nëse vjen me biçikletë, me vonesë, e me helmetë të madhe, e presim.