21 Korrik, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditëve të shkuara dhe domethënien e tyre për ne! Artikulli është përmbledhje javore me lajme që kryesuan javë  dhe bëhen një me ty kur ndajmë lajmet e njëjta në Kosovën tonë. Paper ndanë me ty!

Këtë vend, pra Kosovën, e ka ndërtu dashuria! Kështu siç është, me të mirat e të metat e veta. E kanë ndërtu ata që i thojnë ” dheu i vendit tim”. Ani pse bota ende nuk na njeh siç duhet, se nganjëherë as ne se njohim veten, ne kemi çka t’i dhurojmë asaj.

***

Si shembull dje, të rinjtë e të rejat nga Kosova, na e kujtuan që nuk është PISA testim që fol për ta. Ata fituan dje medalje në shkencë, kodim dhe matematikë në garën internacionale STEM në Barcelona.

Ngjarje, e cila ndezi komente në rrjet nga pala serbe.

Fërkimet me kojshitë nuk munguan as në ngjarjet e sportit. Shkëlzen Goqi nga Gjakova – zhytës, i cili përfaqësoi Kosovën në Podgoricë të Malit të Zi, tek “Vezir Bridge” u diskualifikua pasi bëri shqiponjën me duar.

Sipas mediave malazeze, ky veprim i Goqit, u prit me brohoritje nga publiku, teksa të njëjtat media thanë se fituesi i kësaj gare Evald Krnic, ishte iniciator i diskualifikimit të Goqit.

Goqi për TV Syrin, tha se ai u prezantua si “hedhës/zhytës, nga Gjakova dhe jo nga Republika e Kosovës”.

Mos u nal bre shqipe, garat në jetë gjitmonë vazhdojnë, ato s’kanë të ndalur.

***

Sot, mbahet tentativa e 50-të për konstituimin e Kuvendit të Kosovës, në një përpjekje tjetër për të zhbllokuar krizën institucionale që po zgjatë prej muajsh.

Deri tani, të gjitha përpjekjet për formimin e institucioneve të reja kanë dështuar për shkak të mungesës së konsensusit mes partive politike.

Në thelb të bllokadës qëndron mungesa e një marrëveshjeje për krijimin e komisionit, i cili do të duhej të organizonte votimin për kryetarin e Kuvendit.

Partitë PDK, LDK, Lista Serbe dhe AAK e Nisma vazhdojnë të mos propozojnë anëtarë për këtë komision, ndërsa Lëvizja Vetëvendosje insiston në kandidaturën e propozuar për kryetare të Kuvendit, Albulena Haxhiun dhe mënyrën e votimit të fshehtë.

Të shtunën, u zhvillua një takim mes kryeministrit në detyrë, Albin Kurti dhe liderit të Nismës, Fatmir Limaj, por as ky takim nuk solli ndonjë marrëveshje konkrete për tejkalimin e krizës.

LVV dhe NISMA janë “barrikaduar” sa i përket këtij takimi duke mos dhënë asnjë detaj se çfarë ka ndodhur konkretisht.

Takimi u zhvillua në prag të përfundimit të afatit kushtetues, të përcaktuar në Aktgjykimin e Gjykatës Kushtetuese në rastin KO124/25, i cili obligon që Kuvendi të konstituohet brenda 30 ditëve nga certifikimi i rezultateve, respektivisht deri më 26 korrik 2025.

***

Teatri do të zë vend nën qiellin e hapur të Prizrenit, teksa qyteti përgatitet të shndërrohet për tetë ditë me radhë në një skenë të gjallë e të zëshme arti. Edicioni i katërt i festivalit ndërkombëtar të teatrit në ambient të hapur “Prizren Fest”, nis sonte (e hënë) dhe deri të hënën e ardhshme, i sjellë mbi 20 shfaqje e performanca nga gati dhjetë shtete nga rajoni dhe Evropa e përtej, në shumë lokacione që i japin tjetër frymë qytetit historik.

***

Këto ngjarje na kujtojnë se Kosova është si një shtëpi me dyer të hapura, ku nganjëherë hyjnë krizat, por gjithmonë qëndron dashuria që e ka ndërtuar. Ndërsa institucionet ngurrojnë të flasin njëzëri, të rinjtë tanë flasin gjuhën e dijes nëpër botë. Ndërsa politika mbyllë dyert, arti i hap skenat. Dhe në çdo hap, përkundër fërkimeve e pengesave, ky vend vazhdon të rritet i ndërtuar me duar që s’harrojnë dhe me zemra që s’ndalen.