28 Korrik, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditëve të shkuara dhe domethënien e tyre për ne! Artikulli është përmbledhje javore me lajme që kryesuan javë  dhe bëhen një me ty kur ndajmë lajmet e njëjta në Kosovën tonë. Paper ndanë me ty!

Ka njerëz që nuk i humbim kurrë, edhe kur nuk janë më pjesë e përditshmërisë sonë. Sepse lidhja me ta nuk u ndërtua mbi biseda të përditshme, por mbi një ndjenjë të thellë që nuk zbehet me kohë. Janë ata që i mbartim në kujtime, në ëndrra, në mënyrën si i shohim njerëzit e rinj që njohim. Edhe kur rrugët na ndahen, shpirtrat vazhdojnë të flasin në heshtje dhe kjo është bukuria e një lidhjeje të vërtetë: nuk ka nevojë për praninë që të vazhdojë të jetojë.

Çka ndodhi dje në Kosovë?

Mund të duket klishe por “historia që harrohet përsëritet”, e për t’i nderuar të paktën, 14 vjet më parë më 25 korrik 2011, njësitë speciale të Policisë së Kosovës ndërmorën një aksion për të vendosur kontrollë në dy pikat kufitare në veri të vendit, të cilat ishin jashtë kontrollit të institucioneve të Kosovës dhe ku kishte kontrabandë dhe ndikim të fortë të strukturave paralele serbe.

Gjatë këtij aksioni, më 26 korrik 2011, polici Enver Zymberi u vra në një pritë nga serbët, duke shkaktuar një tronditje të madhe në vend. Ai u shpall Hero i Kosovës pas vdekjes.

Të nesërmen, më 27 korrik 2011, protestues serb në veri, të udhëhequr nga struktura paralele, dogjën dhe shkatërruan pikat kufitare në Jarinjë dhe Bërnjak duke përdorur molotovë, buldozerë dhe mjete të tjera.

***

A mund të flasim pak sa të nënvlerësuar janë zjarrfikësit?

Deri në vitin 2008, paga e zjarrfikësve ishte 145 euro. Sot marrin një pagë prej 525 euro ndërsa zjarrfikës praktikant 420 euro teksa shtesën për rrezikshmëri e kanë të njëjtë me disa zyrtarë që punojnë në zyrë pa dritare, 107 euro. Zjarrfikësit nuk kanë sigurim shëndetësor e as jetësor.

Uniformën teknike të vitit 2020 ua kanë zëvendësuar së fundmi, kurse ato për mbrojtje nga zjarri datojnë që nga viti 2020.

Dje në Kosovë nga ora 14:00 deri në orën 20:00 janë raportuar gjithsej 80 vatra zjarri në Kosovë, ndërsa prej tyre ende aktive janë 35 e janë lokalizuar 45 të tjera.

Situata më e vështirë paraqitet në Klinë, më saktësisht në fshatrat Siqevë dhe Resnik.

Fatmirësisht, deri më tani nuk është raportuar për viktima apo persona të lënduar. Situata po menaxhohet nga Agjencia e Menaxhimit Emergjent dhe Njësitë e Zjarrfikësve me të gjitha kapacitetet në dispozicion.

“U bëjmë thirrje të gjithë qytetarëve të tregojnë kujdes të shtuar, të shmangin çdo veprim që mund të shkaktojë zjarr dhe të raportojnë menjëherë çdo vatër të dyshimtë në numrat emergjentë 112, 193 ose 192. Agjencia, në bashkëpunim me Njësitë e Zjarrfikësve dhe Policinë e Kosovës, mbetet në gatishmëri të plotë. Agjencia falënderon zjarrfikësit për përkushtimin e tyre të palodhshëm, Policinë e Kosovës dhe KFOR-in për mbështetjen, si dhe qytetarët për bashkëpunimin”, ka njoftuar AME-ja.

***

Paneli i gjyqtarëve të Gjykatës Speciale në Hagë ka vendosur që dëshmitarët dhe provat e mbrojtjes për Hashim Thaçin, Kadri Veselin, Rexhep Selimin dhe Jakup Krasniqin të fillojnë të paraqiten nga 15 shtatori e tutje. Vendimi u mor pas shqyrtimit të ankesave të mbrojtjes, të shprehura në konferencën për ecurinë e lëndës, ku avokatët kërkuan më shumë kohë për përgatitje.

***

Vetëm një vit më parë, një bursë prej 1,000 eurosh për regjistrim në programet e Gjuhës dhe të Letërsisë Shqipe në Fakultetin e Filologjisë në Universitetin e Prishtinës kishte ngjallur një valë entuziazmi. Mbi 100 aplikantë u rreshtuan për të ndjekur këto drejtime, duke tejkaluar parashikimet e vet stafit akademik.

Por shpresa nuk zgjati. Studentët nisën të largoheshin. Në orët akademike mbetën vetëm nga pesë vetë. Nga 60 studentë të regjistruar në secilin program, vetëm gjysma vazhduan në Gjuhë, ndërsa në Letërsi mbetën vetëm gjashtë.

Sivjet situata është edhe më e rëndë. Paralajmërimi për kritere të reja për marrjen e bursës, por edhe mungesa e besimit, kanë bërë që në Letërsi Shqipe të aplikojnë vetëm 18 persona, nga 102 sa ishin vitin e kaluar. Vetëm 15 janë pranuar në afatin e parë.

Kur një shoqëri e sheh “Gjuhën dhe Letërsinë” veçse një drejtim “pa perspektivë”, atëherë problemi nuk është tek studentët që nuk aplikojnë por tek vlerat që po braktisim të gjithë, ngadalë, e pa shumë zhurmë.

***

Kur ndalojmë së luftuari për të mbajtur gjallë gjëra që nuk janë të destinuara të qëndrojnë, fillojmë të kuptojmë çfarë do të thotë qetësia. Kur s’i detyrojmë më situatat të shkojnë në favorin tonë, gjejmë hapësirë për veten. Pranimi nuk është dorëzim është zgjedhja për të mos humbur veten në përpjekje që nuk na përkasin dhe në atë zgjedhje, fillon një formë e re dashurie: ajo që kemi për veten.