10 Mars, 2025

Ikonat e vogla apo ndryshe logot që përfaqësojnë brendet individuale shpeshherë konsiderohen si fenomene moderne, të cilat kanë kontribuar në zhvillimin e dizajnit grafik.

Ikonat e ndryshme kanë ndihmuar në identifikimin dhe dallimin e brendeve individuale, duke përdorur reprezentimin e shijes dhe perceptimin e identitetit individual.

Derisa dikur simbolet, mbishkrimet në vazo, hieroglifet janë përdorur si logo, sot do të fokusohemi sa kanë ndryshuar ato ndër vite gjatë historisë.

Logot e dikurshme të cilat përdoreshin nga dyqanet dhe baret në formë të sinjalistikës për të përfaqësuar atë që prezantonin, u shndërruan në forma moderne në fillim të viteve 1900, së bashku me printimin masiv.

Kur flasim për një kohë më të hershme,  duket e pabesueshme se si njerëzit edhe në atë kohë kanë ndjekur trendin dhe kanë arritur të kenë suksesin e tyre. Dhe vijmë në përfundim se ajo çfarë ka ndryshuar është thjesht vetëm koha.

Përshtatja ndaj kohës

Me zbulimin e shtypshkronjës çdo gjë ndryshoi, njerëzit mësuan për printimin, për gazetat e para si dhe reklamat. Gjatë vitit 1840, ardhja e shtypshkronjës me ngjyra në treg rriti përdorimin e posterave.

Frank Mason Robinson projektoi logon e Coca Cola-s në vitin 1885, gjë që shënoi hapjen e “Epokës Moderne”, të logos.

Kudo në Amerikë mund të shihje një poster me logon e Coca Cola-s. Jo shumë ndryshe nga e tashmja, Cola nuk e ndryshoi fontin klasik të shkronjave asnjëherë, nga një logo bardhë e zi, kompania i shtoi imazhin e fortë grafik të formës së diskut me ngjyrën e kuqe, i cili u bë një gurthemel për sinjalistikën e jashtme. Logoja e Coca Cola-s ndryshoi përkatësisht çdo vit, duke i shtuar apo larguar disa detaje të vogla mirëpo gjithmonë ruajti origjinalitetin.

Ndryshe nga atëherë, vitet e 2000-ta, njihen si vitet e dixhitalizimit, ku teknologjia solli Photoshop-in si një nga mjetet e sofistikuara të dizajnit grafik. Nga ky vit, logoja bazë e çdo kompanie filloi të ndryshonte.

Logo me shkronja të rrumbullakosura, ngjyra të ndezura dhe pjerrtësi të shumta ishte trendi që kishte përballë çdo dizajner grafik, e cila solli në treg dizajnin e sheshtë.

Ky lloj i dizajnit të logos hoqi karaktere stilistike si hijet, teksturat dhe gradientët por ajo që logot minimaliste dhe dizajni i logos së sheshtë arrijnë në të vërtetë është një ndjesi më e qartë, më e pastër, më moderne dhe një shpërqendrim minimal ndaj thelbit të asaj që komunikohet.

Nga viti 2010, brendet kryesore kanë përqafuar faktin se për të qëndruar aktual, ata duhet të përditësojnë rregullisht logot e tyre.

Vlen të potencohet Google, brend i cili përditëson logon e saj rregullisht, me  ndryshime që janë gjithmonë të vogla, duke e bërë logon moderne por të identifikueshme menjëherë.

Fakte të thjeshta për logot:

Së pari, ekziston një monogram (ose një germë), që zakonisht përbëhet nga inicialet e një marke (mendoni për llogon e NASA-s, HBO-së, CNN). Më pas vjen shenja e fjalës, e cila është një logo e bazuar në font e të gjithë emrit të biznesit (Coca-Cola dhe Google janë shembujt më të dukshëm). Më pas, faktet e logos së markës tregojnë një shenjë piktoreske, e cila zakonisht është një ikonë ose një simbol grafik i përshkruar në një logo si në logon ikonike të Apple.

Një shenjë abstrakte është një version i ndryshëm i një logoje piktoreske, ku dizajnerët përdorin forma gjeometrike abstrakte (mendoni Nike dhe Adidas).

Ndërkohë, logot e maskotave përfshijnë një lloj karakteri të ilustruar (si KFC). Së fundi, ka shenja kombinimi dhe logot e stemave. E para është një kombinim i shenjave të fjalëve ose shkronjave dhe shenjave piktoreske (Doritos, Burger King), ndërsa e dyta i referohet një fonti brenda një simboli (si Starbucks).