Çfarë privilegji me qenë i lodhun prej punës që dikur e ke lutur universin me të beku me të. Çfarë privilegji me u ndje edhe i ngulfatur nga rritja dhe brengat qe vijnë me rritjen pasi ke ëndërru gjithmon për diçka të tillë. Çfarë privilegji me pas mundësinë të dalësh prej situatave që ke mendu që asnjëherë nuk ia del. Jeta është e bukur.

Çka ndodhi dje në Kosovë?

Është ajo koha miq, kur gjithçka ka hijeshi, rrugët janë ma të mbushura, kioska në rrugë nuk frikësohet që s’do ketë shitje për grimcat që ka brenda, klubet janë full, kolona ka por nuk nervozhesh si zakonisht se e di që i ka shkaktuar fluksi i mërgimtarëve, e jo diçka që nuk ta merrë mendja e të del papritur.

Për shkak të fluksit të shtuar të qytetarëve dhe pranisë së bashkatdhetarëve nga diaspora, Komuna e Prishtinës ka vendosur të zgjasë orarin e punës për disa shërbime komunale si: pajisja me dokumente për gjendjen civile, certifikatën e lindjes, martesës etj.

Nga data 8 korrik, orari i shërbimeve komunale u zgjatet deri në ora 17:00, në vend të orarit të përgjithshëm 08:00–16:00.

Me fillimin e ardhjeve të mërgimtarëve edhe fluksi në pikat kufitare ka nisur të rritet, veçanërisht atë të Dheut të Bardhë.

Sipas informacioneve në faqen zyrtare të Ministrisë së Punëve të Brendshme, të shtunën pasdite, për të hyrë në Kosovë përmes kësaj pike, pritjet po shkojnë nga 30 deri në 40 minuta, ndërsa për dalje nga vendi, pritjet janë më të shkurtra, rreth 5 deri në 10 minuta.

Në pikat e tjera kufitare, situata paraqitet më e qetë.

Në Merdarë, pritjet janë minimale, 3 deri në 5 minuta si për hyrje, ashtu edhe për dalje.

A ka semafor që e ndalë këtë rradhë.

***

Shqetësim ju solli por mendjen nuk ua ndërroj, as deklarimi i Trump që tash së fundi thotë se ndali një eksalim me Serbinë, nuk i lëkundi nga qëndrimi partitë, ani që për rrezikun thojnë se janë të vetëdijshëm, puna që nuk po kryhet në kuvend nuk ua merr mendja që mund të bëjë dëmë në siguri edhe për herë të 46-të.

Madje ministri në detyrë që i drejton punët e brendshme, topin ja gjuajti komandatës supreme, tha “le të vjen presidentja, le të na tregon vetë”.

Po nuk duket që kjo ishte temë diskutimi të shtunën në mbrëmje kur kryeministri Kurti u takua me zyrtarin e lartë të departamentit amerikan të shtetit, Brendan Hanrahan.

Sido që të jetë e vërteta, i dërguari për misione të posçme i Amerikës, Richard Grenell, dje në platformën “X”, ka share një pjesë të lajmit për deklaratën e Vjosa Osmanit në ligjeratën e saj në Washington, duke shkruar:

“Turp për Vjosa Osmanin që po manipulon fjalët e presidentit Donald Trump”.

Teksa kjo e fundit ka paralajmëruar për një konferencë për media, pas kthimit nga Shtetet e Bashkuara të Amerikës, të cilën e ka bërë të ditur Bekim Kupina, zëdhënës për media nga zyra e presidencës.

***

Dy artistë nga Kosova jenë pjesëmarrës sivjet në edicionin e dhjetë të “NOmade Biennale”, një platformë ndërkombëtare e artit bashkëkohor që sfidon konvencionet e kapitalizmit përmes kolektivitetit, kujtesës estetike dhe aktivizmit vizual. Ekspozita e parë e projektit “EXTENSIONES I: Post-Capitalism” është çelur të shtunën në galerinë “Casa D’Alva” në Fortaleza të Brazilit. Kanë kaluar 10 edicione nga fillimi i projektit “NOmade Biennale”, i cili ka lëvizur përmes më shumë se 20 vendbanimeve nomade dhe 14 qyteteve në 8 shtete e dy kontinente, me ndërhyrje artistike në hapësira të pazakonta si burgje të braktisura, spitale, zona lufte apo kisha gotike. Tani, një përzgjedhje artistësh nga ky rrjet prej 120 pjesëmarrësish nomadë nga 58 kombe, prezantohet në Muzeun AAL si pjesë e retrospektivës së këtij projekti unik.

***

Sa e veçantë është që mund të imagjinojmë gjëra, gjithçka madje falas. Kurdo, kudo dhe askush nuk e ka mundësinë të shoh imagjinatën tënde përveç teje. Me të ke fuqinë të ndërrosh lojën, të supozosh, të paramendosh këndvështrimin tjetër, anën tjetër të historisë.