23 Mars, 2025

Shkruan: Erletë Rrustemi

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditës së djeshme dhe domethënien e tyre për ne! Artikujt janë ditorë dhe bëhen një me ty kur ndajmë përditshmërinë e njëjtë në Kosovën tonë. Paper ndanë me ty!

Mirëdita ty, lexues, që nuk i vendos jetës kufizime dhe nuk krijon pritshmëri nga askush. Mendoj se në përditshmërinë tonë ekziston një e vërtetë që nuk duhet mohuar: duhet ta largojmë mendjen nga ajo që kemi planifikuar, në mënyrë që të pranojmë atë që na pret!
***

Çka ndodhi dje në Kosovë?

Java po përfundon, dhe e tëra u përqendrua rreth Hashim Thaçit, ani pse ai, as me veprimtari e as fizikisht, nuk është këtu tash e pesë vite. Por nuk është që vëmendja rreth Thaçit e largoi atë nga ngjarjet e tjera.

Kryetari i LDK-së, Lumir Abdixhiku, ka bërë të ditur se gjatë mbrëmjes të së shtunës ka qëndruar në Llap, në kuadër të “Turneut të Falënderimit”, ku është takuar me qytetarë të kësaj ane.

Po ja di rendin boll mirë, sikur po thotë: Unë ju njoh edhe pas fushatës, e sidomos në komunën e Agim Veliut.

Ai tha se ndjenë kënaqësi dhe sheh një kërkesë të qartë, këmbëngulëse, nga njerëzit e tij për të vazhduar me plot insistim në rrugëtimin e përcaktuar të Lidhjes së tyre.

***

780 mijë njerëz hyjnë çdo ditë në Prishtinë! S’di qysh po na mbanë rruga!

Kryetari i Prishtinës, Përparim Rama, ka njoftuar se janë kryer mikroanaliza të detajuara për të përmirësuar menaxhimin e trafikut në kryeqytet. Sipas tij, më shumë se një e treta e banorëve të Kosovës hyjnë çdo ditë në Prishtinë.

Më 24 mars shënohet 27-vjetori i Epopesë së Dukagjinit, ku Ushtria Çlirimtare e Kosovës në Gllogjan ka zhvilluar njërën nga betejat më të ashpra me ushtrinë serbe.

E për nder të kësaj dite, të hënën do të ketë disa aktivitete. Kjo ditë njihet edhe si Dita e Dëshmorëve të Dukagjinit dhe fillimi i sulmeve të NATO-s.

Ish-zëdhënësi i NATO-s, Jamie Shea, e ka quajtur inkurajuese deklaratën për bashkëpunim ushtarak mes Kosovës, Kroacisë dhe Shqipërisë.

Ai ka thënë se marrëveshja e nënshkruar nga ministrat e mbrojtjes të të tri shteteve nuk është drejtuar kundër Serbisë.

Po përveç Serbisë, askush tjetër nuk e quan këtë marrëveshje kërcënuese!

***

Një vikend elektrik në Servis Fantazia, listening-barin e dashtun të Prishtinës me zërimin më të mirë në qytet.

Të premten, muzika ishte në duart e Rhafaela Akl, një DJ dhe producente nga São Paulo i Brazilit, që erdhi drejt e në Prishtinë, ndërsa të shtunën atmosferën e mbajti lart Alban Hi-dini.

Servisi pati kokteje të shkëlqyera, një publik edhe më të mirë, e ne s’dinim a të dilnim të premten, të shtunën apo thjesht t’i bënim të dyja netët për vete.

***

Akti i madh kurajoz që duhet të bëjmë të gjithë është të kemi guximin të dalim nga historia dhe e kaluara jonë, në mënyrë që të mund të jetojmë ëndrrat tona.