21 Shkurt, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditës së djeshme dhe domethënien e tyre për ne! Artikujt janë ditorë dhe bëhen një me ty kur ndajmë përditshmërinë e njëjtë në Kosovën tonë. Paper ndanë me ty!

Nëse e ke pyetur veten: pse gjithmonë i përsërisim situatat ku përherë kemi dalë të lënduar? Sepse jeta do të të detyrojë të kalosh në të njëjtat përjetime derisa ta marrësh mësimin e merituar. Derisa të mësosh për vlerën e diellit kur të të ngrohë fytyrën në mëngjesin e ftohtë.

Çka ndodhi dje në Kosovë?

Në javën e dytë që nga dita e zgjedhjeve, dhe të dytën edhe me numërimin e votave, teksa përqindja më e madhe e tyre është numëruar, dalin dëshirat dhe planet e atyre që ishin në peng të votave.

PDK dje ia mori një deputet LDK-së, duke e lënë me 19, ndërsa për vete i bëri 26. AAK nuk pati ndryshime, duke ruajtur 8 deputetë, por duke rritur brenda Nismën, e cila mori 3 deputetë. Ka mundësi që, pas numërimit të votave nga diaspora, të bjerë edhe në 2.

A do të thotë kjo që Fatmir Limaj mund ta ketë vulën për krijimin e një qeverie të re?

Në një intervistë në Debat Plus, Limaj e vuri në fokus se sa me rëndësi është që vendit t’i bëhet zgjidhja, pa marrë parasysh se kush është kryeministër.

Nëse e shohim hollë e hollë, Limaj ka bërë disa ndryshime të konsiderueshme përgjatë viteve. Ai e ndau PDK-në, duke marrë një numër të konsiderueshëm votash në fillimet e ndarjes. Ka pasur ndikim të madh në VLAN-in e 2014-ës, etj.

S’është për t’u mbajtur larg mendjes që me 3 deputetë të Nismës dhe plus 47 të VV-së, krijohet një qeveri!

***

Ja një pasqyrë e 10 personave me te votuar të këtyre zgjedhjeve:

Albin Kurti (VV) –  266,798 vota

Glauk Konjufca (VV)  –  204,599 vota

Bedri Hamza (PDK) –  153,789 vota

Lumir Abdixhiku (LDK)  –  112,474 vota

Faton Peci (VV)  –  99,380 vota

Hekuran Murati (VV)  –  97,193 vota

Albulena Haxhiu (VV)  –  92,029 vota

Xhelal Sveçla (VV)  –  87,975 vota

Memli Krasniqi (PDK) –  87,288 vota

Donika Gërvalla-Schwarz (VV)  –  81,862 vota

***

Dje, në Teatrin e Prizrenit, më 20 shkurt, është mbajtur premiera e një shfaqjeje koreografike me titullin Brendësia e kostumit, e prodhuar nga DancePriFest Prizren.

Sipas përshkrimit të shfaqjes:
“Në një hapësirë të përbashkët, katër personazhe me karaktere të ndryshme ndërveprojnë, duke krijuar një lojë të vazhdueshme tensioni dhe harmonie. Përplasjet, ndikimet dhe ndërhyrjet mes tyre zbulojnë marrëdhënie komplekse, ku një varëse simbolike i lidh – një metaforë për rrënjët, përkatësinë dhe kufijtë e identitetit.”

***

Të duash dikë tjetër është e lehtë, pasi është largim nga vetja, të cilën kërkojmë ta gjejmë te dikush tjetër. Lufta e vërtetë është ta duash veten me gjithë zjarrin që ke brenda saj. Dhe më beso, lexues, se gjithçka është brenda teje. Nuk do të gjesh as dashuri më të madhe tek të tjerët, as mëshirë, as mirëkuptim, as dhembshuri, nëse nuk e ke brenda vetes!