2 Mars, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditës së djeshme dhe domethënien e tyre për ne! Artikujt janë ditorë dhe bëhen një me ty kur ndajmë përditshmërinë e njëjtë në Kosovën tonë. Paper ndanë me ty!

Ndonjëherë është më mirë t’i lësh gjërat të shkojnë dhe të mos u japësh më vëmendje njerëzve apo situatave lexues i dashur. Mos kërko shpjegime, justifikime, mbyllje, vërtetim apo përgjigje. Mos jeto një jetë të përqendruar te ajo që të tjerët bënë apo nuk bënë. Përqendrohu te mënyra se si dëshiron të ndihesh dhe çfarë mund të bësh për këtë. Paqja vjen kur e kupton se lumturia jote krijohet nga ti. Ti je përgjegjës për veten tënde.

***

Çka ndodhi dje në Kosovë?

Numëroni, numëroni… diçka tjetër mos po doni?!! KQZ, a keni orë? Apo çka ka tre a? Çka thoni ju, me i publiku rezultatet për Bajram?

Me këto numërimet e deritanishme, Lëvizja Vetëvendosje ka mbërritur në 49.3 për qind të votave me postë për zgjedhjet parlamentare të 9 shkurtit. Përqindja e re është nga procesimi i të dhënave nga 23.4 për qind e vendvotimeve.

A po i bën 51.2 deputetë apo çka është puna?

Para përditësimit të mbrëmjes të shtunën, VV-ja kishte 2,669 vota nga numërimi me postë, apo 44.33 për qind. LDK-ja ishte e dyta, AAK-Nisma e treta dhe PDK-ja e katërta.

E nime, me atë trendin e 80 përqindëshit në votimin në përfaqësitë diplomatike, ku LVV i pati mbi 80 për qind të votave, qysh ndodh që me postë i ka vetëm 44 për qind?

Në votimet në vendvotimet në Kosovë, VV-ja ka marrë 40.9 për qind.

Shnosh… Marsi i gjatë, dikur e marrim vesh!

***

Çka me tregu tjetër bre, lexues?

Situata e Trumpit me Zelenskyn e ka çoroditur sistemin. Tash e tutje, sikur ka dhënë drojë edhe për atë që ka me u bë kryeministër i Kosovës.

Kjo ka me qenë udhëzues se qysh me i mbajtë raportet dhe ka me reflektu në mënyrën se si duhet trajtuar SHBA-ja nga ata që e kanë nevojë. E Kosova jo që e ka nevojën, po duhet të mendohet tri herë e të flasë një herë.

***kulturë

“Zhurma e Artistëve”, një projekt i Galerisë Qahili, ka filluar aktivitetin nga gjysma e shkurtit, por është e hapur deri më 14 mars, çdo ditë nga ora 12:00 deri në 18:00.

Ky projekt, sipas organizatorëve, për herë të parë u mbajt në vitin 2013 dhe bashkon artistë nga fusha të ndryshme të artit, duke u ofruar mundësinë të shkëmbejnë ide, të diskutojnë dhe të krijojnë kontakte të reja.

Tash formati ka evoluar dhe sivjet Galeria Qahili është transformuar në një atelie të hapur – një rezidencë artistike ku do të mirëpriten artistë nga mediume të ndryshme. Po ashtu, është e hapur edhe për artdashësit dhe vizitorët e tjerë.

***

Mos shko në gjumë me mendje të rënduar. Nëse ka diçka që të shqetëson për momentin, shënoje diku dhe liroje mendjen. Jepi vetes leje të pushojë qetësisht sonte.