21 Shkurt, 2025

Nëse inspiroheni nga fotot e Pinterest për natyrën, mos u mendoni dy herë dhe vizitojeni këtë vend.

Po flasim për: Maja e Tref Kufirit (Maja e Tre Kufinjve) është një pikë malore ku takohen kufijtë e Kosovës, Shqipërisë dhe Malit të Zi. Ky vend shënon një nga pikat më të veçanta gjeografike në rajon dhe është një destinacion i njohur për alpinistët dhe adhuruesit e natyrës.

Maja ndodhet në një lartësi rreth 2,366 metra mbi nivelin e detit.

Pozicioni gjeografik, është pjesë e Bjeshkëve të Nemuna (Alpet Shqiptare), një zinxhir malor i njohur për relievin e ashpër dhe natyrën e paprekur.

Si pikë simbolike në majë është vendosur një gur simbolik që shënon ndarjen midis tri shteteve.

Çfarë mund të vizitosh në këtë zonë që ta shijosh natyrën shqipe?

 

Nëse ngjitesh në Majën e Tref Kufirit, në varësi të drejtimit nga vjen, mund të eksplorosh:

Liqenin e Plavës dhe Gucisë në Mal të Zi, një vend me natyrë të bukur dhe histori të pasur shqiptare.

Liqeni i Plavës është liqen në Mal të Zi. Për nga gjeneza është liqen akullnajorë. Liqeni i Plavës shtrihet ndërmjet Alpeve shqiptare (Bjeshkët e Nemuna) dhe malit Vizitor, nëbasenin e Plavës. Liqenin e ndërtojnë morenat ballore të akullnajës së Plavës, e cila akullnajë këtu ka përfunduar.

Liqeni i zemrës në Kosovë, një liqen i vogël por i mrekullueshëm pranë Gjeravicës.

Liqeni i Zemrës, gjendet në Bjeshkët e Nemuna afër Majës Gusan, 400 m në kufi me Shqiperinë dhe ka një lartësi mbidetare prej 2,539 m ndërsa ka një gjatësi maksimale prej 150 m, me gjerësi 120 m.

Forma e tij si një zemër e bën atë shumë të bukur dhe mjaft tërheqës për turistët e huaj dhe vizitorët vendas. Rreth e qark këtij liqeni ndodhen edhe shume liqene të vegjël, kryesisht akullnajorë të cilët mbushen me ujërat e borës qe shkrihen në stinën e Pranverës.

Pasi gjendet në një lartësi të konsiderueshme mbi nivelin e detit, uji i liqenit është shumë i pastër, por edhe mjaft i ftohtë. Prandaj është e vështirë që të laheni në këtë liqen, por mund të freskoheni pasi keni bërë një ecje të gjatë për të arritur deri në këtë vend kaq të pëlqyer.

Thethin dhe Valbonën në Shqipëri, dy nga destinacionet më të bukura të Alpeve Shqiptare.

Rugovën në Kosovë, me kanionet e saj madhështore dhe shtigjet alpine.

Historia e kësaj pike

 

Dikur kjo zonë ka qenë një pikë kufitare e patrulluar, veçanërisht gjatë regjimit komunist në Shqipëri, ku kalimi ilegal ishte i rrezikshëm. Kufiri ishte i mbyllur dhe kontrollohej rreptësisht. Pas viteve ‘90, me hapjen e kufijve dhe rritjen e interesit për turizëm, kjo zonë është kthyer në një destinacion të njohur për hiking dhe alpinizëm.

Si të arrish atje?

 

Nga Kosova, mund të nisësh nga Juniku ose nga Gropa e Erenikut.

Nga Shqipëria, përmes Valbonës dhe pastaj duke u ngjitur në drejtim të Jezercës.

Nga Mali i Zi, prej nga Plava apo Gucia, me një rrugë të bukur malore.

Nëse ke në plan ta eksplorosh, sigurohu të kesh pajisje të përshtatshme, sepse terreni është malor dhe kërkon përgatitje të mirë fizike.