20 Shkurt, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditës së djeshme dhe domethënien e tyre për ne! Artikujt janë ditorë dhe bëhen një me ty kur ndajmë përditshmërinë e njëjtë në Kosovën tonë. Paper ndanë me ty!

Më e mira që ke bërë ndonjëherë po të pengon, po të bën të mendosh se aq mundesh ti. Lëre të kaluarën. Ti krijon të ardhmen. Gjithçka që të duhet është brenda teje. Ti zgjedh si ta përdorësh.

Kafen që e le të ftohet sot në mëngjes, nesër mund të zgjedhësh ta pish të nxehtë.

***

Çka e karakterizoi ditën e djeshme?

Janë 29 kandidatë që do të jenë për herë të parë deputetë, tregojnë rezultatet e siguruara nga partitë politike, bazuar në numërimin e 78 përqind të vendvotimeve nga KQZ-ja. Sipas këtyre të dhënave, që janë jozyrtare, 39 deputetë të legjislaturës së kaluar kanë mbetur jashtë Kuvendit.

Më së shumti deputetë të rinj ka LVV-ja, 13 sosh. Pas saj është PDK-ja me 9 deputetë. E treta është LDK-ja me 6 deputetë të rinj dhe AAK-ja me vetëm një.

Nëse arrihet kuota gjinore prej 30 përqind, ka prej tyre që rrezikojnë vendin. Po ashtu, ka kryetarë komunash që do ta lirojnë pozitën e deputetit për pozitat që veçse kanë.

Gruaja më e votuar në këto zgjedhje është Albulena Haxhiu me rreth 80 mijë vota.

Lexues, këta janë përfaqësuesit tuaj/tanë, njerëzit që ky vend i ka rritur dhe bërë deputetë. S’ke me dëgju për një/dy tre milionë, as mos e ke atë dert, as nuk ke me dëgju që ari është shitur me shuma “marramendëse”, as nuk ke me dëgju për ambalazhues të ujit që shfrytëzojnë resurset natyrore. Veç le të krijohet qeveria e Kuvendi, se jo çfarë…!

***

Zyra e Prokurorit të Specializuar ka njoftuar të mërkurën se deri në gjysmën e prillit do të përfundojë me paraqitjen e fakteve para Gjykatës në Hagë, për rastin kryesor në gjykim, ndaj ish-udhëheqësve të Shtabit të Përgjithshëm të UÇK-së: Hashim Thaçi, Kadri Veseli, Rexhep Selimi dhe Jakup Krasniqi.

“4 prill është data e fundit e parashikuar. Nuk do të thërrasim asnjë dëshmitar pas kësaj date. Brenda 15 prillit do të dorëzojmë mocionet e fundit me shkrim, përfshirë mocione joverbale dhe provat përkatëse. Kjo është data që është planifikuar”, ka bërë të ditur prokurori Matt Hawling.

***kulturë

Birthdance është një festival që ka filluar si festim i ditëlindjes së DJ Secret47 (Gent Rizaj), por përgjatë viteve është rritur dhe shndërruar në festival të mirëfilltë me muzikë, arte, yoga, ushqim organik, që mbahet në shumë lokacione.

Programi ka filluar më 19.02 me Opening Dance në MONROE, vazhdon më 20.02 me White Theme Dance në GRAPE (Hotel Garden), pastaj më 21.02 me Dance with a View në NOYA, me finalen e madhe më 22.02 në ZONE CLUB. Ndërsa të dielën më 23.02, festivali e ndërron atmosferën duke e bërë më i qetë, me ushqim të mirë dhe arte në EDHE. Ndërsa më 01.03, Birthdance zhvendoset në Tiranë, me një Dance në Tunel.

***

Ti je gjithmonë në përmirësim. Nuk je kurrë i/e njëjtë. Je dinamik/e. Më e mira që do të bësh ndonjëherë është ende atje përpara teje, duke pritur që ta arrish. Rrënja nuk dallon nga fruti; çka ke mbjellë ndër vite në ëndrrat e tua, realizohet nëse vrapon pas tyre.