4 Mars, 2025

Shkruan: Erletë Rrustemi

 

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditës së djeshme dhe domethënien e tyre për ne! Artikujt janë ditorë dhe bëhen një me ty kur ndajmë përditshmërinë e njëjtë në Kosovën tonë. Paper ndanë me ty!

Mirëmëngjesi, lexues. Mos mendo se gjithçka duhet patjetër ta bësh sot. Ke ende shumë perëndime për të parë, oqeane e dete për të shijuar, zogj për të dëgjuar. Gjithmonë ka dashuri, shpresë dhe mirësi. Ti kurrë nuk do të mbetesh pa asgjë. Ka aq shumë më tepër në jetë sesa ajo që ndjen tani.

Çka ndodhi dje në Kosovë?

Kurrë më të dëshpëruar se në këto zgjedhje me KQZ-në nuk kemi qenë. Ende nesër dalin rezultatet finale, së bashku me ato të mërgatës.

Çfarë befasie që LDK-ja e arrin 30 përqindëshin e votave me postë, ndërsa VV-ja bie në 51 për qind.

Teksa ky rezultat po sjellë edhe zhgënjim për partinë në pushtet dhe po bën që të ketë sjellje agresive në Qendrën e Numërimit dhe Rezultateve, e njëjta është ankuar në PZAP se qindra fletëvotime janë shpallur të pavlefshme nga numëruesit në QNR.

Trendi vazhdon… Lëvizja Vetëvendosje ka mbërritur në mbi 28 mijë vota nga procesi i numërimit, duke vazhduar trendin e mbi 50 për qind të votave.

***

Galeria Qahili shënon “Natën e Zjarreve,” dedikuar sakrificës që solli lirinë

Homazhi për jetën dhe rezistencën e 36 orëve historike shënohet me anë të instalacionit në Galerinë Qahili më 5, 6 dhe 7 mars, nga ora 19:00. Ky instalacion shoqërohet me muzikën e këngëtarëve eminentë të vendit tonë, të miksuar nga DJ Flow, për ta rikrijuar atë që është përjetuar gjatë 36 orëve dhe atë që ne e përjetojmë sot.

Kjo ngjarje përcjellet me video arkivore, të qasshme për publikun, dhe me veprat e artistit Eshref Qahili, të cilat simbolizojnë pikën kulmore të ndryshimit të vendit tonë.

***

Vazhdojnë sesionet e Jazz Cats në qendrën kulturore DefyThem

Sot, më 4 mars, mund t’i dëgjoni “maçorrat e xhezit”: Dukagjin Muhaxherin në saksofon, Visar Kuçin në kitarë, Enes Beun në tupana dhe të ftuarin special, Enver Muhamedin, në kontrabas. Ata do të sjellin xhazin më të mirë që mund të gjeni në peizazhin muzikor të kryeqytetit.

***

Mendoj se gjëja më e madhe që mund t’i ofrojmë dikujt është të jemi paqja e tyre, ikja e tyre më e butë dhe më e sigurt.
Pas zhgënjimeve që njerëzit marrin nga bota, pas luftës me mendjet e tyre, trishtimit të pavendosur dhe dyshimeve të panumërta për vlerën e tyre – ata na kanë ne.