15 Mars, 2025

Shkruan: Erletë Rrustemi

Kumti i editorëve: Ky artikull është shënuar për t’iu treguar gjendjen tonë emocionale, shpirtërore, politike, financiare, kulturore dhe motoristike bazuar në ngjarjet e vërteta të ditës së djeshme dhe domethënien e tyre për ne! Artikujt janë ditorë dhe bëhen një me ty kur ndajmë përditshmërinë e njëjtë në Kosovën tonë. Paper ndanë me ty!

Është një karrige që t’pret të ulesh, në tavolinat që ende nuk i ke parë. Dyer që do të hapen, aty ku ti nuk ke trokitur ende. Dhoma që presin për praninë tënde, kur ti ende nuk ke ëndërruar për to. Vende që fshehin bukurinë e tyre për t’u fotografuar nga memoria jote e kujtimeve… Ka kaq shumë gjëra që të presin, andaj, lexues, beso në rrugëtimin tënd!

Në botë janë tre palë personalitetesh. Nganjëherë të ndarë në tre njerëz të ndryshëm, nganjëherë të tre prej personaliteteve gjenden në një të vetëm. Ata që thonë “mirëmëngjesi”, “gjesi” dhe që e nisin ditën pa përshëndetje hiç. Kështu që, mirëmëngjesi për secilin version që sot ta bën qejfin, lexues!

Dje në Kosovë?

Koha ka filluar të jetë me diell, ka rregullar edhe disponimin e njerëzve… por pa u “shkundë plakat” tamam mirë, mirë nuk bëhet. Me këtë “shkundje të plakave” vjen edhe ndonjë ndryshim interesant… si gjithmonë. Komisioni Qendror i Zgjedhjeve pritet që sot të shpallë rezultatet përfundimtare. Pra, që nga 9 shkurti deri më tash kemi pasur rezultatet preliminare, dhe tashmë KQZ ka njoftuar se mund t’i shpallë rezultatet përfundimtare. Por, kur certifikohen rezultatet?

Gjykata Supreme, gjatë ditës së djeshme, ka marrë vendimin për ankesën e fundit të parashtruar nga Partia Demokratike e Ashkalinjëve (PDAK)-LPB.

Supremja ka refuzuar ankesën e PDAK-së lidhur me manipulimet e votave me postë, duke e quajtur edhe si të “pathemeltë”.

Meqë kjo ishte ankesa e fundit në Supreme, Komisionit Qendror të Zgjedhjeve i është hapur rruga për t’i shpallë rezultatet përfundimtare të zgjedhjeve të 9 shkurtit 2025.

Pak e zgjata, kthehem tek pyetja: kur certifikohen rezultatet?

Tash, nëse dikujt nuk i pëlqejnë rezultatet >>> ankohen. Ankesat paraqiten në PZAP. Nëse PZAP hedh poshtë ndonjë ankesë, pala e pakënaqur ankohet në Gjykatën Supreme. Nëse Supremja i hedh poshtë >>> i hapet rruga KQZ-së për certifikim. E nëse ndonjë ankesë shqyrtohet nga Supremja, procesi vonohet për disa ditë. KQZ e harton raportin e rezultatit final dhe e dërgon në Presidencë, e cila obligohet që brenda 30 ditëve ta thërrasë mbledhjen konstituive të Kuvendit të Kosovës.

Pas kësaj, e kuptojmë efektin e “plakave”.

***

Për disa pika të shesheve nuk pajtohemi, sidomos derisa nuk ekziston një zgjidhje tjetër alternative (me autobusë, transport) që lehtëson qarkullimin dhe trafikun, po në disa aspekte i jap të drejtë Komunës së Prishtinës.

Me vëmendje po i përcillja online informatat rreth protestës së shoferëve të autobusëve nga Podujeva, të cilët dje kanë protestuar para objektit të Komunës kundër vendimit për linjat ndërurbane. Ky vendim është zbatuar dhe respektuar në vazhdimësi nga linjat ndërurbane që vijnë nga Drenasi, Peja, Gjakova, Mitrovica, Ferizaj dhe qytete të tjera.

Ky vendim kërkon që linjat ndërurbane të përdorin rrugët rajonale dhe të kenë si pikë ndalimi “Stacionin e Autobusëve”. Deri tani, autobusët nga Podujeva kanë qarkulluar edhe brenda Prishtinës, gjë që ka shkaktuar trafik.

Nëse të gjithë njerëzit që vijmë nga qytetet e tjera në kryeqytet e kemi pikë nisjeje stacionin e autobusëve, cili është problemi që u paraqitet udhëtarëve nga Podujeva? Ku qëndron kundërshtimi? Pse kjo rezistencë ndaj ndryshimit?

Apo veç është çështje e rrugës që nuk u përshtatet për të “thyer rrugën”? Hajde, se ka zgjidhje, ka!

***

Dje, të premten, më 14 mars me fillim nga ora 20:00, në Gjilan u dha shfaqja mysafire nga Teatri “Bekim Fehmiu” – Prizren, Deni dhe deti i thellë i kaltër.

Shfaqja tregon për një histori të fuqishme dashurie, faljeje dhe luftën për të mos u dorëzuar. Në mes të kaosit, dy njerëz të vetmuar përballen me veten dhe njëri-tjetrin, duke kërkuar mirëkuptim dhe shpresë në një botë që duket se ka dalë nga boshti i saj.

Autori është dramaturgu, skenaristi dhe regjisori i famshëm amerikan, John Patrick Shanley. Në Gjilan shfaqja erdhi me regji të Ana Batevës, ndërsa luajtën Liridona Shehu dhe Alban Krasniqi.

***

Nëse do të më pyesje: “Çka është lumturia për ty?” (pra, për mua), pasi vazhdimisht ke diçka për ta përshkruar jetën, do të thoja: shëndeti dhe të qenit një familje. ❤️