11 Dhjetor, 2024

Kur puna shpërblehet, motivimi rritet. Po aktorët në Kosovë, sa janë shpërblyer ndër vite që të ndikojë në motivimin e tyre për punë?

Në shumicën e intervistave ku marrin pjesë aktorët tanë, kur u bëhet pyetja “A më shumë e shijoni aktrimin në teatër apo në filma/seriale?”, ata përgjigjen duke thënë: “Në teatër!”. E sa i ka shpërblyer puna në teatër aktorët tanë, flet edhe gjendja e sotme.

Grevë! Aktorët tanë po hyjnë në muajin e parë të grevës. Arsyeja e saj janë pagat e vogla të aktorëve tash e sa kohë dhe koeficienti i ulët.

Mungesa e shfaqjeve është një heshtje e vdekur për kryeqytetin, sidomos në një kohë kur pati një ngritje të vetëdijes për vizitat në teatër. Po më parë? Disa prej aktorëve që janë sot në grevë ishin pjesë e super-serialeve vendore, që pas tyre zor se i zëvendëson dikush me impaktin që kishin krijuar.

Çfarë i motivoi dikur aktorët e serialeve “Familja Moderne”, “Kafeneja jonë” dhe “Tre gjermanët e trashë”?

Serialet si “Tre gjermanët e trashë” dhe “Kafeneja jonë” pasqyronin një periudhë tranzicioni dhe identiteti pas luftës. Ato shërbenin si një mënyrë për të kapërcyer traumat kolektive dhe për të ndërtuar një ndjenjë humori dhe shprese.

Sot, interesat dhe problemet sociale janë më të fragmentuara, duke e bërë më të vështirë krijimin e përmbajtjes që lidhet njësoj fuqishëm me një publik të gjerë dhe gjërat që përjetojmë.

Pse në çdo episod të këtyre serialeve kemi qeshur? Pse sot, një serial që prodhon shumë të shara është senzacion në fillim, e pastaj “bëhet bajat” pas një muaji?

A do të thotë kjo që nuk dimë si shoqëri se çfarë na duhet për të na bërë të qeshim?

Më herët ka pasur shpresë, aq shumë sa sot ende në komentet në YouTube gjen njerëz që argëtimin e shijojnë në episodet e kaluara të serialeve të lartpërmendura.

Arsyeja pse sot prodhohen më pak seriale vendore si “Familja Moderne”, “Kafeneja jonë” dhe “Tre gjermanët e trashë” lidhet me disa faktorë ekonomikë dhe kulturorë. Ja disa nga arsyet kryesore që ndikojnë në këtë ndryshim:

Në vitet kur u prodhuan këto seriale, shpesh kishte mbështetje financiare nga institucionet publike apo sponsorët privatë. Aktualisht, televizioni vendor shpesh përballet me mungesë burimesh financiare për të investuar në projekte të gjata dhe të kushtueshme si serialet.

Shtrirja e platformave ndërkombëtare si Netflix dhe YouTube ka ulur interesin për investime në prodhime vendore, pasi konkurrenca është më e madhe dhe audienca shpesh preferon përmbajtje të huaj.

Gjatë asaj kohe, aktorët ishin të motivuar nga dëshira për të zhvilluar industrinë e filmit dhe televizionit, e cila ishte ende në hapat e para pas luftës në Kosovë.

Serialet si “Familja Moderne” dhe “Kafeneja jonë” ofronin një platformë për aktorët që të shfaqnin talentin e tyre dhe të krijonin lidhje të forta me audiencën.

Krijimi i një industrie të qëndrueshme serialesh kërkon më shumë mbështetje financiare, bashkëpunim ndërmjet mediave dhe përqendrim në shijet dhe kërkesat e audiencës shqiptare, si dhe në promovimin e vlerave kulturore. Përpjekjet e reja si “Kombinati” dhe projektet në Gjirafa Video tregojnë një potencial për të rifilluar këtë traditë.