21 Shkurt, 2025

A e dini që koncepti i ri arkitekturor për sallën e Teatrit dhe Baletit të Kosovës është i frymëzuar nga xhubleta?

Koncepti është prezantuar nga arkitekti danez Bjarke Ingels, i cili e fitoi garën në mesin e disa propozimeve.

Në prezantimin e tij më 3 shkurt, ai ka shpjeguar konceptin e tij për dizajnin:

“Kemi provuar të krijojmë, le të themi, fabrikën më racionale dhe efikase të interpretimeve. Pastaj, për ta bërë më atraktive për publikun, e kemi lënë ndërtesën të hapur nga të gjitha anët që të jetë ftuese. Zgjedhja arkitekturore bazohet në xhubletën. Në njërën anë është një ndërtesë racionale e krijimit të interpretimeve, e në tjetrën, një ndërtesë që fton qytetarët të hyjnë brenda”, ka thënë ai.

Projekti duket madhështor, por njëkohësisht shumë i vështirë për t’u zbatuar në rrethanat e Kosovës, duke pasur parasysh përpjekjet për të ndërtuar ndërtesa publike përfaqësuese. Janë katër salla: një me 1.200 ulëse, një tjetër me 1.000 dhe dy me nga 300 ulëse.

Teatri i Operës dhe Baletit pritet të jetë shtëpia e katër institucioneve: Filharmonisë së Kosovës, Baletit Kombëtar të Kosovës, Ansamblit Kombëtar të Këngëve dhe Valleve “Shota” dhe Operës së Kosovës.

Mos ndoshta në vitin 2080 do të përfundojë?!!!

Përpjekjet për këtë objekt janë të kahershme. Më herët, më 2 dhjetor 2009, ishte vënë guri themeltar për këtë ndërtesë afër Fakultetit Teknik, kishte raportuar Koha.

Atëherë mendohej që ndërtesa të mbante edhe emrin Teatri i Operës dhe Baletit “Dr. Ibrahim Rugova”. U shpenzuan mbi një milion euro dhe projekti i asaj kohe nuk u realizua kurrë. Për projektin e ri, shpenzimet kanë nisur, ndërkohë që Ministria e Kulturës dhe Komuna vazhdojnë përplasjet verbale dhe ato ligjore.

Cili është stili arkitekturor i Bjarke Ingels?

Ingels, danezi i cili me stilin e tij mbush arkitekturën me një përzierje unike të pragmatikes dhe utopikes, krijon një ballafaqim midis elementëve të mrekullueshëm të dizajnit dhe veçorive lokale. Ndërtesat e tij kanë gjithmonë një pamje befasuese, ndërkohë që përshtaten me peizazhin dhe terrenin.

Ai hulumtoi në thelb historikun e Kosovës për të arritur në një përfundim mbi formën e Teatrit që i përshtatet Kosovës.

Bjarke Ingels, njëherësh themeluesi i shtëpisë prestigjioze të projektimit “BIG”, është ndër arkitektët më inovativë të kohës sonë, i njohur për projektet mbresëlënëse si rrokaqielli piramidal “Via 57 West” në New York, centrali energjetik “CopenHill” me pistë skijimi në Kopenhagë, selinë e “Google” në Kaliforni dhe “The Spiral” në Manhattan.

Lokacioni për këtë objekt është paraparë të jetë te “Pallati i Rinisë”, por kjo është një çështje e diskutueshme për shkak të mosmarrëveshjeve mes Ministrisë së Kulturës dhe Komunës së Prishtinës.

“MKRS-ja e kishte zgjedhur një hapësirë që nuk ishte mjaftueshëm e madhe për të ndërtuar ndërtesën e Teatrit të Operës dhe Baletit. Unë ua kam ofruar hapësirën prapa Pallatit të Rinisë. Është një projekt madhor për të mirën e vendit dhe kam kërkuar që të bashkëpunojmë. MKRS-së i ka dështuar njëherë procesi, përderisa ne kemi shtyrë përpara nevojat e kryeqytetit me platformën që e lidh ‘Arbërinë’ me Pallatin e Rinisë dhe Sportit. Është një projekt madhor, i cili nuk e cenon në asnjë mënyrë Teatrin e Operës dhe Baletit. Pra, e kemi lënë hapësirën për Teatrin”, ka thënë kryetari Rama.

Prishtina ka edhe objekte të tjera të papërfunduara, si salla koncertale te objekti i ish-“Gërmisë”.