12 Shkurt, 2025

Legjislatura në ikje po ia lë vendin një qeverie të re, e cila së shpejti do të formohet me ministra të rinj, të përzgjedhur për të udhëhequr ministritë adekuate, që holl e holl duhet t’i takojnë pak edhe fushës/profesionit për ministrinë që zgjedhin.

Ndërsa negociatat politike vazhdojnë për të përcaktuar kush me kë do të qeverisë, janë disa pyetje që në diskutimet e përditshme i bëjmë ose themi: “Qysh ka qenë puna e kësaj/këtij?” etj. Populli e ka një fjalë – “me lëshu pe”, e zakonisht njerëzit i kanë qejf edhe personat që lëshojnë pe në politikë.

P.sh.: A ka pasur ministra në qeverinë e Kosovës që njihen për integritetin e tyre në këtë qeveri apo në të tjerat e që i kanë bërë për vete qytetarët me veprimet e tyre?

Politika është fushë ku kompleksiteti i fuqisë dhe ndërgjegjja nuk qëndrojnë në të njëjtin vend. Megjithatë, përgjatë historisë kemi pasur persona që kanë dhënë dorëheqje morale për pasojat që, kushtimisht, rrëshqitja e menaxhimit në atë moment i ka shkaktuar.

Dorëheqja morale në Kosovë është akt shumë i rrallë. Megjithatë, një veprim i tillë ka ndodhur vetëm një herë në Kosovën e pasluftës.

Në vitin 2007, pas vrasjes së dy aktivistëve të LV-së nga policët rumunë të UNMIK-ut, ish-ministri i Punëve të Brendshme, Fatmir Rexhepi, kishte dhënë dorëheqje. Ndonëse nuk kishte përgjegjësi të drejtpërdrejtë për atë krim, ish-zyrtari i LDK-së kishte ofruar dorëheqjen si akt moral.

Në këtë mandat, jashtë asaj çka ka qenë diskutim publik, por vetëm zyrtarisht, ish-ministri i Mbrojtjes, Armend Mehaj, kishte dhënë dorëheqje me arsyetimin për shkaqe familjare.

“Ministri Mehaj ka dhënë dorëheqje për arsye familjare. Për sqarime më të hollësishme do të prononcohet vetë”, kishte theksuar për Koha.net Liridona Gashi nga zyra për media e Ministrisë së Mbrojtjes.

Mehaj ishte emëruar si ministër në këtë pozitë në vitin 2021, kur ‘Qeveria Kurti 2’ kishte filluar mandatin, pastaj u largua në gusht të 2023-shit.

Pas Mehajt, në këtë pozitë u emërua Ejup Maqedonci.

Para se ta merrte pozitën e kreut të Ministrisë së Mbrojtjes së Kosovës, Mehaj kishte jetuar dhe punuar në Norvegji.

Përtej arsyetimit të tij pas dorëheqjes, në media qarkulloi arsyeja për një përplasje verbale mes Mehajt dhe zëvendësit të tij në këtë ministri, Shemsi Sylës.

Çka ka qenë saktësisht meseleja nuk e dimë. Ajo çka ndodhi më pas janë titujt nëpër mediat e ndryshme se si ish-ministri i Mbrojtjes, Mehaj, kishte fituar zemrat e popullit.