15 Shkurt, 2025

Ivica Kostelić, emri që për dekada dominoi skijmin, po nis një kapitull të ri në eksplorimin e maleve më të egra të Evropës-Bjeshkët e Nemuna.

I lindur në një familje sportdashëse në Zagreb, ai dhe motra e tij, legjenda e skive Janica Kostelić, rishkruan historinë e sporteve dimërore kroate. Me katër medalje olimpike të argjendta dhe një titull të përgjithshëm në Kupën e Botës, Ivica nuk u ndal me mbylljen e karrierës garuese. Pas skive garuese, ai ka kaluar në sfida ekstreme, ku natyra e egër dhe qëndrueshmëria njerëzore testohen në kufijtë e tyre.

Tani, ai ka marrë një mision të ri: përdorimin e aftësive të tij për të përshkuar për herë të parë me ski dimërore Prokletijet, një nga vargmalet më të ashpra të Evropës. Kjo ekspeditë është një provë ekstreme për çdo alpinist dhe aventurier, pasi asnjë nuk ka guxuar më parë të përshkojë këtë rrugë gjatë dimrit.

Prokletijet – sprovë për kampionët

Ekspedita nis në Kosovë, nga Gjeravica, dhe vazhdon përgjatë kreshtave më të egra të Bjeshkëve të Nemuna, për të përfunduar në brigjet e Adriatikut. Kjo sfidë e jashtëzakonshme do të vendosë këto male në qendër të vëmendjes ndërkombëtare si një nga destinacionet më të paprekura për sportet ekstreme.

Ekspedita është e ndarë në dy faza kryesore:

16-23 shkurt – Ndërtimi i bivakëve përgjatë rrugës, zbulimi i terrenit dhe skijimi në masivin kryesor mbi Luginën e Valbonës në Shqipëri.

4-14 mars – Kalimi me ski duke ndjekur një itinerar të përafërt nga Gjeravica në Kosovë, përmes Dobërdolit, Qafës së Vranicës, Zla Kolatës, Rosni Peak, Buni i Jezerces, Dhe i Bardhë, Buni i Bajraktarit, Repishtit dhe Koplikut, për të mbërritur në Liqenin e Shkodrës dhe më pas në lumin Buna deri në Detin Adriatik.

Në këtë udhëtim të jashtëzakonshëm, Kostelić ka pranë vetes disa nga emrat më të njohur në botën e alpinizmit dhe skijimit:

Mathieu Maynadier (Francë) – Një nga alpinistët dhe ngjitësit më të mirë të akullit në botë.

Bertrand Delapierre (Francë) – Një alpinist, skitar dhe kineast i njohur, i cili ka realizuar dokumentarë mbi ekspedita të ndryshme në disa prej terreneve më të vështira të globit.

Gjatë fazës së parë të projektit, ata do të shoqërohen nga fotografi dhe piloti i dronit Didi Koerbler

Aty ku malet janë të pamposhtura, vetëm kampionët guxojnë të sfidojnë të pamundurën.