8 Korrik, 2025

Çka është historia e “rezervimi juaj është fshirë nga realiteti”?

Kjo është ajo që i ndodhi një turisti nga Jemeni, i cili kishte rezervuar dy netë në Theth, një nga fshatrat më të bukur dhe më të kërkuar për turizëm malor në Shqipëri. Por kur mbërriti mëngjesin e 8 korrikut, në vend të vilës që kishte rezervuar, gjeti… një shesh të zhveshur. Ndërtesa ishte shembur.

“Jam nga Jemeni. Ky është rezervimi im. Çfarë të bëj unë? Jam me familjen time. Nuk është mirë për vendin tuaj. Kur rezervon një hotel, pret të të presin. Jo ta gjesh të prishur”, tha ai i shokuar.

Siç doli më pas, pushuesi kishte rezervuar në një kompleks vilash që ishte shembur një ditë më parë (7 korrik) nga Inspektorati Kombëtar i Mbrojtjes së Territorit (IKMT), me mbështetjen e Policisë së Shtetit dhe autoriteteve lokale. Aksioni ishte pjesë e një fushate për largimin e ndërtimeve pa leje në zonën e mbrojtur të Thethit.

Banorët e zonës që kishin ndërtuar kabina prej druri për të pritur turistët, u shprehën të papërgatitur për këtë aksion të menjëhershëm.

“Thonë bëni turizëm, por s’të lënë,” tha një zonjë që menaxhonte disa prej strukturave. “Si mund t’i largojmë turistët për disa orë, ku t’i çojmë?”

Në gjithë atë sipërfaqe ku po ndërhyhet, ishin vendosur rreth 10 kabina, të përshtatura si bujtina. Aty nisi edhe një sërë denoncimesh publike të kryeministrit Rama, i cili prej disa ditësh po publikonte në rrjetet e tij sociale pamje të ndërtimeve në zonën e mbrojtur. Reagimi i tij nuk kishte lidhje me turistin nga Jemeni, por me vetë ndërhyrjen e shtetit ndaj objekteve pa leje.

Kreu i qeverisë akuzoi edhe prokuroren e Shkodrës, Elsa Gjeli, duke thënë se ajo kishte justifikuar mosfillimin e hetimeve me arsyetimin se bujtinat ishin “konteniere pa themele” dhe nuk përbënin ndërtim pa leje.

Deri tani, vetëm në Theth janë shembur rreth 20 objekte të ndërtuara në hapësira publike apo në kundërshtim me statusin e zonës së mbrojtur. Sipas burimeve, operacioni do të vazhdoj, pasi janë identifikuar edhe struktura të tjera pa leje.

Thethi është shpallur zonë e mbrojtur natyrore që prej vitit 2015. Sfida mbetet e njëjtë: si të mbrohet natyra pa larguar njerëzit që vijnë për ta përjetuar atë?

Storja për vizitorin nga Jemi, u shfaq në Klan të Shqipërisë.