17 Mars, 2025

Marija Taseva po shijonte një natë jashtë së bashku me motrën e saj në klubin Pulse në Koçan, Maqedoni të Veriut, kur ndodhi tragjedia e madhe.

Ato kishin shkuar për të përcjellë performancën e grupit të famshëm hip-hop DNK, kur ndodhi zjarri që vrau së paku 59 persona dhe la të lënduar 155 të tjerë.

“Të gjithë po bërtisnin duke thënë: ‘dilni jashtë, dilni jashtë’”, tha 19-vjeçarja për Reuters.

Të gjithë po mundoheshin të iknin nga flaka, por në objekt ishte vetëm një dalje për 500 persona që ishin brenda, ndërsa dera e pasme e lokalit ishte e mbyllur.

“Nuk e di se si, por përfundova në tokë dhe nuk mund të ngrihesha në ato momente, teksa të tjerët po shkelnin mbi mua”, tha Taseva.

Ajo arriti të dilte jashtë, ndërsa motra e saj nuk ia doli.

“Motra ime vdiq, mua më shpëtuan, atë jo.”

story: bbc

Policia ka arrestuar 15 persona, ndërsa ministri i Brendshëm, Pançe Toskovski, tha se ka baza të dyshimit për ryshfet dhe korrupsion në lidhje me licencën e lokalit. Ndër të arrestuarit janë pronari i lokalit dhe ish-zyrtarë të qeverisë.

Kryeministri i vendit, Hristijan Mickoski ka thënë se nuk do të ketë “mëshirë” për këdo që është i përfshirë, pavarësisht nga rangu politik apo përkatësia partiake.

Zjarri filloi rreth orës 02:30 të dielën, pasi shkëndijat e mjeteve piroteknike prekën tavanin, i cili ishte ndërtuar nga materiale lehtësisht të ndezshme, tha ministri i Brendshëm Toskovski.

I përshkruar si “klub nate i improvizuar” nga shtypi maqedonas, lokali, i cili ndodhej 100 km në lindje të Shkupit, nuk posedonte licencë ligjore për të vepruar, tha Toskovski.
Më parë ka qenë një magazinë qilimash dhe policia po vazhdon hetimet.

“Shumica e të vdekurve kanë pësuar lëndime nga rrëmuja që ka ndodhur, në panik gjatë përpjekjes për të dalë. 70 prej pacientëve kanë djegie dhe helmim nga monoksidi i karbonit”, u tha gazetarëve të AFP-së drejtuesja e spitalit të Koçanit, Kristina Serafimovska.

Vladislav Gruev, specialist i kirurgjisë rikonstruktive dhe plastike në Klinikën Universitare për Sëmundjet Kirurgjike, i cili ka trajtuar të mbijetuarit, tha se shumica e të lënduarve kanë djegie ekstensive në mbi 18% të sipërfaqes së trupit, përfshirë djegie të shkallës së dytë dhe të tretë në kokë, qafë, bustin e sipërm, duar dhe gishta.

Inspektimet e së dielës treguan disa “anomali” në vendin e ngjarjes, duke përfshirë “mangësi” në sistemin e shuarjes së zjarrit dhe ndriçimit, tha zëdhënësja e Zyrës së Prokurorit Publik, Biljana Arsovska.

Duke folur jashtë spitalit, vullnetari i Kryqit të Kuq, Mustafa Saidov, tha se shumica e atyre që vdiqën ishin të rinj.

“Brenda, ku po identifikojnë viktimat, situata është shumë më e keqe. Prindërit janë mjaft të rinj, rreth të 40-tave. Fëmijët e tyre janë 18 ose 20 vjeç. Situata është brutale, kaotike; historitë janë shumë të trishtueshme dhe fatkeqësisht shumë të rinj kanë humbur jetën”, tha ai.

Shumë prindër dhe të afërm që po presin për informacion janë të zemëruar dhe kërkojnë përgjigje, si Dragi Stojanov, i cili humbi fëmijën e tij të vetëm në zjarr.

“Më lejoni t’ju them para të gjithëve. Më xhironi. Unë kam humbur gjithçka; kam pasur një fëmijë dhe e kam humbur. Pas kësaj tragjedie, për çfarë më duhet kjo jetë? E gjithë Evropa duhet ta dijë,” u tha ai gazetarëve.

Presidentja e Maqedonisë së Veriut, Gordana Siljanovska-Davkova, tha se duhet të mbahet përgjegjësi për atë që ndodhi.
“Asnjë nga përgjegjësit këtë herë nuk duhet t’i shmanget ligjit, drejtësisë dhe dënimit. Asgjë nuk është më e vlefshme se jeta njerëzore, veçanërisht jeta e të rinjve”, tha ajo.

Të lënduarit me plagë më të rënda janë dërguar për trajtim në klinikat e specializuara në Bullgari, Greqi, Serbi dhe Turqi, shtoi presidentja.

Në spitalin Pirogov të Bullgarisë janë pranuar gjithsej tetë persona të lënduar nga zjarri në diskotekën e Koçanit, tre prej të cilëve janë nën moshën 18 vjeç, tha drejtori i spitalit, Valentin Dimitrov, për mediumin bullgar BTA.

Tre nga të pranuarit janë nën moshën 18 vjeç – dy vajza dhe një djalë, ndërsa pjesa tjetër – katër burra dhe një grua – janë mesatarisht 22-25 vjeç. Pacienti më i vjetër është 31 vjeç. Sipas Dimitrovit, gjendja e tyre është e rëndë.

Qeveria ka shpallur shtatë ditë zie kombëtare dhe do të mbajë një seancë urgjente si pjesë e hetimeve të vazhdueshme për mënyrën se si ndodhi incidenti.

Rastet e zjarreve në klube nate që kanë përfunduar me fatkeqësi janë të shumta. Një nga ngjarjet më tragjike, ishte zjarri që shkaktoi vdekjen e mbi 200 njerëzve në klubin e natës Kiss në qytetin Santa Maria në Brazilin Jugor. Hetuesit thanë se shkuma izoluese e zërit në tavan mori flakë dhe lëshoi gazra helmues që vranë shpejt ata që merrnin pjesë në festë.

foto: EPA

Huazuar nga mediat maqedonase dhe BBC.