12 Shkurt, 2025

Në prag të Shën Valentinit, pa tendencën që t’ua mbushim feed-in tuaj me lule dhe romanticitet të tepruar (edhe pse kurrë nuk është i tepërt), po ju sjellim një ide që ka marrë vëmendje të madhe në rrjetet sociale.

Një profil në TikTok, Nikita Morozov, i njohur për komentimin e ideve të biznesit, ka vënë në pah një lulishte nga Shqipëria me emrin Lotus Flower Tirana dhe një koncept inovativ që ka tërhequr vëmendjen e përdoruesve: çanta transparente për lule.

Në vend që buqetat të mbështillen me letër ose plastikë tradicionale, këto çanta elegante dhe minimaliste krijojnë një prezantim më unik dhe të rafinuar. Jo vetëm që duken bukur dhe moderne, por ofrojnë edhe një mënyrë më të lehtë për transportimin e luleve, duke ruajtur formën dhe freskinë e tyre.

Ky koncept është një shembull se si një ide e thjeshtë mund të kthehet në një trend viral dhe të sjellë vëmendje ndërkombëtare. Për lulishten që e implementoi këtë ide, kjo është një mundësi e artë për t’u zgjeruar dhe për të krijuar një markë të njohur për dizajnin inovativ të buqetave.

Një koncept interesant që shpjegon ndikimin e kreativitetit në biznes është “diferencimi i perceptueshëm”. Ideja është që njerëzit shpesh zgjedhin një produkt ose shërbim jo vetëm për funksionalitetin e tij, por për mënyrën se si prezantohet dhe si i bën ata të ndihen.

Për shembull, lulja si produkt është e njëjtë, një tulipan mbetet një tulipan, pavarësisht se ku e blen. Por sapo dikush vendos ta paketojë ndryshe, në një çantë transparente elegante, e gjithë përvoja ndryshon. Nuk po shet më vetëm një tufë lulesh, por një moment, një ndjesi, një mënyrë të re për ta dhuruar. Dhe kjo jo vetëm që tërheq vëmendjen, por edhe krijon një identitet unik për biznesin.

Në treg, një ide e tillë nuk ka nevojë të jetë revolucionare, shpesh mjafton një ndryshim i vogël në prezantim për të tërhequr më shumë klientë dhe për të krijuar një trend. Kjo është arsyeja pse kreativiteti nuk është thjesht një shtesë në biznes, por shpesh një faktor vendimtar për suksesin.

Ky koncept të kujton shembuj të tjerë si paketimet kreative të çokollatave, kafenë e servirur në mënyrë unike ose restorantet që tërheqin klientë me përvoja të pazakonta.

A mendon se kjo vlen për të gjitha bizneset apo vetëm për disa fusha të caktuara?