25 Nëntor, 2025

Bob Ross është një nga figurat më të dashura në historinë e artit modern amerikan. Me stilin e flokëve, karakteristikë kaçurellat, qetësinë në të folur dhe peizazhet që përçonin lumturi, ai u bë simbol i qetësisë dhe kreativitetit për miliona shikues. Por, përkundër famës së tij të jashtëzakonshme, një mister i madh e ka shoqëruar emrin e tij për dekada, faktin se ku mbaheshin pikturat e Bob Ross?

Edhe pse Bob Ross realizoi mbi 30,000 piktura gjatë jetës së tij, koleksionuesit, muzetë dhe fansat nuk mund të blejnë asnjërën prej tyre. Ato nuk shfaqen në ankande, në galeri, apo në internet. Duket thuajse e pabesueshme se si një trashëgimi me vlerë milionëshe, qëndron e zhdukur nga publiku.

Të paktën deri në këtë vit, pasi piktura e tij nga viti 1986 është shitur në ankand për më shumë se 1 milion dollarë, dhe fitimet do shkojnë për mbështetjen e Transmetimit Publik në SHBA. Ross, i njohur për “The Joy of Painting” vazhdon të ketë ndikim edhe 20 vjet pas vdekjes.

Kërkesa erdhi nga John Oliver në episodin final të kësaj sezone të “Last Week Tonight”, ku ai u kërkoi trashëgimtareve të nxirrnin një nga pikturat për të mbështetur PBS-në. Piktura “Cabin at Sunset”, e realizuar në sezonin e 10-të të vitit 1986, mori 35 oferta dhe arriti në 1,044,000 dollarë.

Kjo nuk është hera e parë që pikturat e Ross-it shiten për këtë kauzë. Bonhams Los Angeles më herët në nëntor, nxori në ankand tri piktura të tjera nga “The Joy of Painting” për të mbështetur Televizionin Publik Amerikan. “Winter’s Peace” (1993) u shit për 318,000 dollarë, ndërsa “Cliffside” (1990) dhe “Home in the Valley” (1990) u shitën përkatësisht për 229,100 dhe 114,800 dollarë.

Këto janë pjesë e një grupi prej 30 veprash të Ross-it që do të shiten gjatë vitit për të mbështetur stacionet publike në gjithë vendin.

Ankandi i organizuar nga John Oliver përfshinte edhe sende të tjera të rralla, si takime me Oliverin, një xhaketë të Russell Crowe dhe figura dylli të presidentëve të ndryshëm, duke mbledhur në total rreth 1.54 milionë dollarë për fondin Public Media Bridge. Ky fond synon të ndihmojë stacionet publike që kanë mbetur pa financim pas vendimit të administratës Trump, për të eliminuar 1.1 miliardë dollarë nga buxheti i Korporatës për Transmetimet Publike.

Në një reportazh të vitit 2019, New York Times tregoi se të gjitha pikturat e Ross janë të ruajtura në një depo, jo shumë luksoze, jo me ndonjë temperaturë dhome të kontrolluar, as me trajtimin se si u jepet pikturave në muze.

Ato i përkasin “Bob Ross Inc.”, kompanisë për të cilën Ross punonte dhe që sot menaxhon imazhin e tij.

Punonjësit atje i ruajnë pikturat në rafte të organizuara mirë, e atëherë patën thënë se i qëndrojnë larg çdo plani për shitje:

“Asnjëherë nuk kemi menduar t’i shesim. Nuk ishte ideja e Bob-it.”

Por pse ka kaq shumë piktura?

Shumë nuk e dinë që për çdo episod të “The Joy of Painting”, Ross realizonte tre versione të së njëjtës pikturë:

Një para xhirimeve (“book”) – zakonisht më e mira.

Një gjatë xhirimeve (“TV”).

Një pas episodit (“Kowalski”), dedikuar bashkëpunëtores së tij, Annette Kowalski.

Në total, Ross krijoi qindra piktura për çdo sezon, duke e çuar numrin në mijëra.

Kush janë familja Kowalski dhe pse kanë ata të gjitha pikturat?

Historia ka një kthesë personale. Annette dhe Walt Kowalski, të cilët humbën djalin e tyre, u regjistruan rastësisht në një kurs arti të mbajtur nga Bob Ross. Annette u mahnit nga aftësitë dhe qetësia e tij. Lidhja e tyre miqësore çoi në krijimin e kompanisë “Bob Ross Inc.”.

Me kalimin e viteve, Ross jetoi dhe punoi me ta dhe pas vdekjes së tij, pothuajse të gjitha pikturat mbetën në pronësi të familjes Kowalski dhe kompanisë së tyre.

A janë të dallueshme pikturat e vërteta?

Punonjësit e kompanisë thonë se ka shenja të qarta që tregojnë nëse një pikturë është origjinale:

Ross rrallë pikturonte njerëz. Përdorte goditje të sakta e të shpejta, rrezet dhe retë e tij kishin formën e tij karakteristike.

Ai kishte një mënyrë unike se si “prekte” pemën vetëm me një brushë.

Edhe pse programi “The Joy of Painting” nuk transmetohet më prej 20 vitesh, Ross është më i famshëm se kurrë. Rishfaqja e tij në platformën Twitch në vitin 2014 e shndërroi në fenomen të ri kulturor, të dashur sidomos nga brezat e rinj. Ai u bë simbol i pozitivitetit, thjeshtësisë dhe kreativitetit të lirë.

Sot, imazhi i Bob-it gjendet kudo: në çorape, filxhanë, bluza, artikuj arti, gjithçka, përveç pikturave të tij.

Për herë të parë, disa prej pikturave të tij u paraqitën në Smithsonian Museum of American History, një moment që vetë Ross dikur e shihte si të pamundur.

Pse e duan njerëzit Bob Ross-in?

Ndoshta pyetja më interesante, të cilën edhe stafi i kompanisë e ngre është:

“Pse janë kaq shumë njerëz të fiksuar me Bob Ross?”

Për shumë fansa, Bob Ross nuk është thjeshtë një piktor. Ai është një figurë qetësuese, pothuaj si terapi, përcjellja e episodeve të tij shndërrohet nga kurioziteti në adhurim të thellë, duke e bërë publikun të ndjekë jo një, por dhjetëra episode rradhazi.

Siç e përshkruan bukur edhe ata që ruajnë pikturat e tij.

“Nuk është vetëm piktura. Është Bob-i. Është ‘person-a’ i tij.”

Piktura “cabin at sunset”